Igandean, irailaren 29an, egingo da Urduña Herri Krosa. Foru Plazatik abiatuko da 11:30ean eta kategoria ezberdinentzako erronkak prestatu ditu Arando korrikalari taldeak.
Helduek 5 euro ordaindu beharko dituzte lasterketan parte hartzeko, baina txikiek eta minitxikiek izena doan emateko aukera izango dute. Gainera, horiek guztiek oparia izango dute eta lehenengo hirurek dirutan jasoko dute saria. Minitxiki mailan 2005ean edo geroago jaio direnak lehiatuko dira eta 600 metroko ibilbidea beteko dute. Txikiak, aldiz, 1998. eta 2004. urteen artean jaiotakoak dira eta 1500 metroko lasterketa egingo dute.
Beteranoek ere kategoria bereziak izango dituzte, "A" -1963. eta 1973. urteen artean jaiotakoak- eta "B" -1962. urtean edo lehenago jaio direnak-.
Herri Krosa
Berez, lasterketa 1997an edo lehenago jaio direnentzat prestatuta dago. Hauen artean, bai emakumezkoek zein gizonezkoek sari ugari jasotzeko parada izango dute, bakoitza bere mailan. Lehena heltzen denak 60 euro eta trofeoa jasoko du, bigarrenak 50 euro eta trofeoa, hirugarrena 40 euro eta trofeoa eta hurrengo hamabiak 40 euro.
Tokiko lasterkarientzako aitorpena ere egongo da. Helmugara helduko den lehen lasterkari urduñanarrak 40 euro eta trofeoa jasoko baititu.