Urduñako Alderdi Popularrak sozietate publikoak murriztu behar direla adierazi du ohar batean
Urduñako PPk esan du gastu publikoaren murrizketa sozietate publikoetatik hasi behar dela. Alderdi horren arabera, sozietate publiko askok ez dute funtziorik betetzen eta gobernatzen duenak konfiantzazko jendea jartzeko “txiringito” moduan erabiltzen ditu.
Jose Maria Beascoechea zinegotzia buru duen udal-taldeak Urduñederra sozietate publikoaren kasua aipatu du. Sozietate horrek bere kabuz bizirauteko gaitasunik ez duela erakutsi du, eta oraindik bizi bada udalak emandako diru-laguntzegatik eta bere kapitalaren zati bat saltzeagatik da; PPren uztez. Gainera, sozietate horrek betetzen dituen funtzioei buruzko “dudak” dituela adierazi du udal-taldeak.
Hortaz, Alderdi Popularrak adierazi du ez duela Urduñederraren orain arteko funtzionamendu bera onartuko, eta kudeaketa berdinarekin jarraituz gero desegin beharko litzatekeela uzte du. Hori guztiari buruz eztabaidatzea “ezinbestekoa” dela dio alderdiak.
Aurreko legegintzaldia argitu beharreko “duda eta susmoz “ beteta zegoela azaldu du PPk. “Kapital salmentan, kredituen transferentzian, abalen onarpenean eta finantza-saneamenduko planetan oinarritutako legislatura bat bukatu berri dugu”. Horregatik, udalaren erradiografia zehatz eta gaurkotu bat egin behar dela esan du, kontu publikoen benetako egoera zein den ikusteko.