"Recuerda que venimos del infierno" obra argitaratuko du urtarrilean Maria Luisa Goikoetxeak. Orain dela 2 urte burmuinean hemorragia izan zuenetik gaur egun arte izandako esperientzia jasotzen du bertan Goikoetxeak. "Nire egoeran dauden beste pertsonei laguntzeko asmoz" adierazi du.
Orain dela urtebete, tren geltokietan mugikortasun arazoak dituztenentzako arrapala jar dezaten eskatzeari ekin zion eta ordutik hainbat ekimen burutu ditu bere eskaria aldarrikatzeko. Obra horretan Renferi eta Arartekoari bidalitako mezuak zein jasotako erantzunak bildu ditu, hedabideetan publikatutako artikuluekin batera.
Izenburu esanguratsua
Liburuaren izenburua, "Recuerda que venimos del infierno", Goikoetxeak bere senarrari egindako omenaldia da, izan ere, adierazi duenez, berak beti errepikatzen omen duen esaldia da Goikoetxea goibel eta adorerik gabe sentitzen denean.
Aurkezpena
Urtarrilaren 20an egingo dute liburuaren aurkezpena, Alondegian, arratsaldeko 19:00etan. Liburuak Urduñako Arantza eta Mahor liburudendetan egongo dira salgai. Médicos Sin Fronterasi emango dizkio Goikoetxeak liburuarekin lortutako irabaziak.