Atzo bildu ziren Urduñako Udala eta Bizkaiko Foru Aldundia A-625 errepidearen konponketa lanen inguruan hitz egiteko.
Bi kontu landu dira hitzordu horretan. Batetik, 2016ko irailean adostutako hobekuntzak baloratu dituzte eta, bestetik, landu da Urduña eta Amurrio artean dagoen A-625 errepideak izango duen trazadura berriaren gauzatze kronograma.
Hobekuntzak
Aurreko bileran adostutako hainbat lan bukatuta daude dagoeneko: bide-zoruaren fresaketa, segurtasun hesien instalazioa eta bide-seinale berrien instalazioa.
Hala ere, oraindik ere burutu beharreko beste hobekuntza batzuk daude egin gabe. Hurrengo hilabeteetan, besteak beste, hormen konponketa eta goraguneen beheramendua egin beharko da. Alde guztiek positiboki baloratu dituzte hobekuntza obra horiek, ahaztu gabe horien helburua dela errepidea hobetzea proiektu berria gauzatu bitartean.
2019rako
Urduña eta Amurrio artean dagoen A-625 errepidearen trazadura berriari dagokionez, Urduñako Udalak aurreko bileretan adostutakoa nabarmendu du, Foru Aldundiak gauzatze kronograma ezarri eta dagokion zenbatekoa bideratu dezan.
Gauzak horrela, Foru erakundeak 2018ko erdialdean lanak esleitzeko konpromisoa hartu du. 2019ko hasierarako aurreikusi dute lanak abiaraztea eta aurreratu dute 25 hilabetez luzatu daitezkeela.