"Beldur Barik Jarrera!" film laburren lehiaketaren IX. edizioa antolatuko du Emakundek aurten. Ekimenaren helburua aurreko urteetako berdina izango da: “kultura matxistaren zein indarkeria sexistaren adierazpenak eraldatzea”. Hala adierazi dute eskualdeko hainbat ordezkari instituzionalek gaur goizean Urduñan eginiko aurkezpenean.
Aurreko urteetako ildoari jarraiki, eskualdeko lehiaketa antolatuko dute, EAEkoa osatzeko balioko duena. Tokiko lehiaketan 12 eta 26 urte bitarteko gazteek hartu ahal izango dute parte, bi kategorietan banatuta. Horrez gain, kategoria berezi bat egongo da, zeinetan DBH ez duten herrietako 10-12 urte bitarteko gazteek parte hartu ahalko duten.
EAEko lehiaketak Aiaraldekoaren kategoria berdinak izango ditu. “Aurkezten diren lanek erakutsi behar dute nola neska eta mutilek ezberdintasun egoerei aurre egiten dieten Beldur Barik jarrerarekin; alegia, errespetua, parekidetasuna, askatasuna eta autonomia, elkarkidetza eta indarkeria sexistaren bazterketa irmoa adierazten dituzten jarrerekin”, azaldu dute antolatzaileek.
Finala eta sari banaketa, Urduñan
Urduñan egingo da Aiaraldeko lehiaketaren finala eta sari banaketa. Azaroaren 23an izango da zita, Orduña Plaza hotelean.
Beldur Bariken webgune ofizialean (www.beldurbarik.org) kontsultatu daitezke lehiaketaren oinarriak. Azaroaren 9an itxiko da lanak aurkezteko epea.