Cobidea orientazio taldeak antolatu du zirkuitua. Kirola zabaltzeko helburuarekin, beste zenbait herritan ere eskainiko dute jarduera. Horien artean daude Sopela, Bilbo, Zalla eta Otxandio. Urduñakoa izango da aurtengo lehenbiziko ekimena.
Estitxu Ortiz tertangarra dago antolatzaileen artean. Aiaraldea hedabideari egindako elkarrizketan adierazi zuenez, orientazioa ezagutzeko parada ematea izango da xedea. Zirkuituari ekin aurretik, baina, hastapen ikastaroa egingo dute. "Naturaz gozatzeko beste modu bat ezagutu nahi baduzue hauxe da zuen aukera", adierazi dute. Igandean izango da proba herrikoia, 10:00etan hasita. Larunbatean, baina, ikastaroa antolatu dute Alondegian, nahi duen ororentzat.
Ikastaroa, larunbatean
Tailerra gazteleraz izango da, eta 17€ balioko ditu. Prezioaren barruan ikastaro teoriko praktikoa, iparrorratzaren mailegua eta dokumentazioa formatu digitalean daude. Plaza kopurua ere zehaztu dute, "gutxienez 8 pertsonek eman beharko dute izena, eta gehienez 15-18 lagun onartuko ditugu".
Orientazio kirola, iparrorratzaren erabilera, mapen irakurketa, ikurren interpretazioa eta orientazio kirolerako teknikak landuko dituzte Alondegiko saioan.
9:30ean izango da ikastaroko lagunentzat hitzordua. Hala, iparrorratzarekin ariketak egingo dituzte, gidatutako paseoa emango dute mapa eskutan proba zelaian. "Irakaslearen azalpenak entzun arte iparrorratzik ez erostea gomendatzen dugu", erantsi dute. Izen-ematea internet bidez egin beharko da.