Urtarrilaren 15eko goizaldean izan zen erasoa. Ondorioz, leihotik bota zen emakumea, eta erietxean dago geroztik. Gizonezko erasotzailea atxilotu du Ertzaintzak, baina karguekin aske utzi dute. Ertzaintzak baieztatu duenez, "ez da istripua izan" eta indarkeria matxista egozten diote. Aiaraldeko Mugimendu Feministak biharko deitu du manifestazioa, 19.00etan Foru plazan.
Urtarrilaren 15ean goizaldean gertatu zen eraso matxista, Urduñako etxebizitza batean. 44 urteko gizonezkoa atxilotu du Ertzaintzak, ikertzen aritu ondoren, indarkeria matxista leporatuta, baina karguekin aske utzi dute.
Hala adierazi dio Aiaraldea hedabideari poliziak. Atxilotua aske dago, genero indarkeria karguekin. "Urtarrilaren 15eko goizaldean emakume bat bota zen leihotik" zehaztu du Segurtasun Sailak.Ertzaintza eta anbulantzia bertaratu ziren tokira, eta erietxera eraman zuten emakume zauritua. "Ez zen istripua izan, genero indarkeria baizik", baieztatu dio Ertzaintzak Aiaraldea hedabideari.
Atestatuan oinarritu dira ikerketa abiatzeko, eta 44 urteko gizonezkoa atxilotu dute, erasotuaren bikote ohia. "Justiziaren esku geratu zen kasua. Karguekin aske geratu da gizonezkoa". Argitu dutenez, ez diote erailketa egozten, indarkeria matxista baizik.
Aiaraldeko Mugimendu Feministak gogor gaitzetsi du gertaera. Horrez gain, mobilizazioa deitu dute biharko, 19:00etan Foru plazan.
Urduñako Udalak, berriz, oharra plazaratu du. "Irmotasunez gaitzesten ditugu mota honetako erasoak", azpimarratu du tokiko erakundeak. Erasotuari, familiari eta gertukoei elkartasuna eta babesa helarazi dizkiete. Ildo beretik, Aiaraldeko Mugimendu Feministaren mobilizazioarekin bat egin du, "manifestazioan parte hartzeko gonbidapena" luzatuz herritarrei.
LAGUN AGURGARRIA:
Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide
