Jai Batzordeak asteazkenean erabaki zuen Urduña Abesbatza izango dela aurtengo Otxomaio jaietako pregoilaria. Kultura taldeak 50 urte bete berri ditu, eta Arantza Agirre abesbatzako kidearen esanetan, euren apustua zen pregoilari izatea data berezi horretan.
Agirrek erantsi duenez, harrotasunez hartu dute berria: "Ospakizun bereziak dira Otxomaioak eta guk izango dugu aukera herritar oro ordezkatzeko". Euren asmoa da pregoi bizia eta arina egitea, "baina antolakuntzarekin hitz egin arte ez dugu ezer prestatuko", argitu du Arantza Agirrek.
Bestetik, Santiago txurro-denda kudeatzen duen Barakaldoko familia izendatu dute txupinero. Juana Santiagok “oso pozik” jaso du albistea. Hala ere, harrituta dagoela adierazi du: “Ez dakit jendea nola oroitu den gutaz”. Santiagok gogoratu du bere gurasoak hasi zirela Otxomaioetan lanean orain dela 60 urte. Ordutik, lagun on ugari egin ditu hirian: “Urte 1 nuenetik nator jaietara!”.
Hirugarren urtez Otxomaio Jaietako Batzordeak herri galdeketa antolatu du, herritarrek proposatzeko 2019ko festen pregoilaria eta txupin jaurtitzailea. On line galdetegia zabaltzeaz gain, Alondegian bozkatzeko buzoia jarri zuten horretarako. "Guztira urduñarren 155 proposamen jaso eta baloratu dira", adierazi du udalak.