aiaraldea.eus

Tasio Martin: "Argazkiak argazki, ikusi beharreko espektakulua da Himalaia"

Erabiltzailearen aurpegia Izar Mendiguren Cosgaya   Kirola  Urduña
Tasio Martin: "Argazkiak argazki, ikusi beharreko espektakulua da Himalaia"

Apirilaren 2an ekin zion "Gorbeia&Ama Dablam" espedizioari Tasio Martinek. Mendiko Lagunakek jakinarazi duenez, 27an aurreikusi dute tontorra zapaltzea. 

Ama Dablam igotzeko asmoarekin Himalaian daude Tasio Martin eta bere aita. Orain arte aklimatatzeko zeharkaldiak egin dituzte. Larunbatean espero dute zapaltzea 6.200 metroko gailurra. "Argazkiak argazki, lehen pertsonan ikusi beharreko espektakulua da Himalaia", adierazi du urduñarrak.

Bidaiaren lehenbiziko egunetan trekkingak burutu zituzten. Besteak beste, Nambchen (3.440m) igaro zuten gaua, 4.000 metrora igotzeko gero. "Oso berriztuta dago Namche, eta beti bezain atsegin", aitortu du Tasio Martinek. Eguraldiari dagokionez, ordea, ez dute baldintzarik onena topatu: "Elur asko dago. Hori dela eta, aklimatazio trekkina egokitu dugu, Renjo La ekiditu eta zuzenean Gokyora abiatuz".

Gorputza altuera garaietara moldatzeko, bost mila metro baino gehiagoko ibilbideak osatu dituzte orain arte: "Planetako begiratoki izugarrienetako bitara joan gara; Gokyo Rira (5.357m) eta Kala Pattharrera (5.550m)". Horrez gain, bi mendi-lepo zeharkatu dituzte: Cho La Pass (5.368m) eta Kongma La (5.535m).

Mendizale aiaraldearraren esanetan, baina, ez da bide erraza izan, "gaixorik igaro ditut zenbait egun". Ondorioz, ezin izan zituen Kala Patthar eta Kongma La tontorrak ukitu. Dena den, Chhukhung Ri (5.550m) gailurrera jotzea erabaki zuen bere burua proban jartzeko: "800 metroko desnibela ordu eta erdian igo nuen, beraz, ez nuen atzera egiteko aitzakiarik".

Astelehenean -apirilaren 22an- izan zuten aklimatatzeko azken erronka: Island Peak (6.189m). "Pangbochen deskantsatuko dugu pare bat egun, eta gero Ama Dablameko kanpo basera igoko gara. Ea eguraldiak hobera egiten duen datorren egunetan". Abenturaren nondik norakoak kontatzeko bloga sortu du Tasio Martinek. 

Ikusi argazki guztiak handiago

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa