Aste honetan zabaldu dute kirol eremu berria. Terrero auzoan kokatu dute erabilera anitzeko kantxa. Itziar Biguri Ugarte alkateak Aiaraldea hedabideari adierazi dionez, udaberrian hasi ziren lanak: “Faseka joan gara egiten. Lehenbizi lurra jarri genuen, gero zorua margotu, eta azken aste honetan futbol ateak eta saskibaloirako kanastak”.
Urduñako Udalaren arabera, 24 orduz egongo da zabalik, “erabileraren arabera baloratuko dugu ordutegia murriztu edo ez”. Izan ere, eremua hesitu dute, eta badaezpadarako atea jarrita dago. “Momentuz irekita mantenduko dugu, baina itxi egingo dugu beharra ikusiz gero”, zehaztu du gobernuburuak.
Arbieto, eraberrituta
Bestalde, Arbietoko futbol zelaian moldaketa ugari egin dituzte. “Belar artifiziala aldatzen ari dira orain. Irailerako bukatuta egotea espero dugu”, erantsi du Biguri Ugartek.
Berez, puntako belar artifizial berria, Euskal Herrian bakarrik Lezaman eta Zubietan dago horrelako materiala. Guztira, 272.194,82 euro bideratuko dituzte horretara.
Lurrarena ez da, ordea, burututako atonketa bakarra: “Teilatua eta aldagelak ere konpondu ditugu”.