Urduñako Bitxobola talde ekologistak hiriak "larritasun klimatikoa" aldarrikatzea eskatu du. Mozioa sartu du horretarako udaletxean, eta iraileko osoko bilkuran eztabaidatuko da.
"Egitasmoa Espainiar estatuko herri ezberdinetan garatzen ari dira, aldaketa klimatikoaren larritasuna azaleratzeko", zehaztu du David Hosking taldeko kideak.
Modu horretan nahi dute instituzioek klimaren egoerari garrantzia ematea eta larritasuna adieraztea. "Ekinbideak proposatzeko hori da lehenbiziko pausoa", adierazi dio Aiaraldea hedabideari.
Aliantza horien bidez erakundeek esku hartzea nahi dute. "Zenbait tokitan lurraldeko aliantzak egin dituzte. Bizkaian baditugu zenbait talde eta toki, lurralde potentea gara".
Funtsean, Eusko Jaurlaritza eta Bizkaiko Diputazioari bultzada eskatzeko tokiko instituzioak lerrokatzea nahi dute "klima larritasunaren adierazpenarekin".
Zehazki, Urduñako Udalak planetaren larritasuna aitortzea nahi dute, tenperatura igoera dela medio, miloi bat espezie baitaude giza jardueraren ondorioz arriskuan.
"Krisi ekologikoak milioika pertsonen heriotza eragin lezake, ama lurrak bizirauteko behar dituen zenbait espeziez gain; ekosistemen artean harreman handia Dago".
Udalari eskaera
Mozioaren bidez udalari zenbait eskakizun egingo dizkiete: negutegi efektudun gasen isurketa 2040 baino lehenago etetea, "eta posible bada 2035 aurretik"; bioaniztasuna mantentzeko konpromisoa eta energia berriztagarrien aldeko apustua, besteak beste.
Era berean, udaleko berrestauratze zerbitzuetan hornidura agroekologikoa erabiltzeko gonbita luzatuko diete, baita herritarrei deialdia helaraztea ere. Azkenik, guzti hori bermatzeko adierazle edo kontrol mekanismoak ezartzeko premia azaleratu dute mozioan.
2010ean sortu zen Urduñako talde ekologista eta urtero ekintza ezberdinak egiten dituzte. Hurrengoa urrian izango da, Hoskingek aurreratu duenez: "Sei hilero garbitzen dugu ibaia auzolanean. Laster dagokigu hurrengo garbiketa".