Urduñatik igaro zen PKK-ko gerrillari alemaniarra

Michael Panser PKK-ko gerrillaria. / ANF

Kurdistango Langileen Alderdiak jakinarazi du 2018. urtearen azken egunetan gerrillari alemaniar bat hil zela bere alde borrokatzen. Gazte iraultzaile horren ibilbide militanteak Urduñara eraman zuen 2013an, bertan egin zen Gazte Danbadara.

Abuztuaren amaieran PKK-k zabaldu zuen Bager Nujiyan gerrillaria Medyan (Irakeko Kurdistanean) hil zela hegazkin turkiarren bonbardaketen ondorioz. Alderdiko kidearen benetako izena Michael Panser zen, jatorriz alemaniarra.

14 urte zituenean hasi zen antifaxismoan eta mugimendu ezkertiarretan lanean. Munduko erakunde, praktika eta ideia eraldatzaileak ezagutzeko Chiapasen, Kolonbian, Nikaraguan edota Venezuelan ibili zen, eta horregatik gazteleraz ondo hitz egiten zuen.

2012an Kurdistango Askapenerako Mugimenduarekin hasi zuen harremana eta 2013an Alemaniatik atera eta Urduñara etorri zen, Gazte Danbadan sinadurak jasotzeko Abdullah Öcallan buruzagi kurdu espetxeratuaren askatasunaren alde.

Danbadako antolatzaileek gogoratu dute Michael Alemaniatik etorri zela autostopa egiten beste kide batekin, YXK ikasle mugimendu kurdu europarra ordezkatzeko: "Danbada hasi baino lehen agertu ziren eta kanpalekua prestatzen lagundu zuten" azaldu du nazioarteko ordezkaritzekin lanean aritu zen lagun batek.

Zer gogoratzen zuen alemaniarrak bere egonaldiari buruz? Sirian ezagutu zuen euskaldun bati aipatu zion bitxia izan zela bere egonaldia Urduñan. Izan ere, jende askok ez zuen Öcallan ezagutzen, baina bere askatasunaren alde sinatu zuten hala ere.

2015ean Michael Panserrek armak hartu zituen lehenengo aldiz Kurdistanen herri yazidia defendatzeko Estatu Islamikoaren mehatxuaren aurrean. Berez, aurreko udan Daexak gutxiengo etniko horren milaka lagun hil egin zituen, eta milaka emakume eta ume ere bahitu. Emakumezkoen kasuetan, saltzeko eta esklabo sexualak bihurtzeko atxiki zituzten.

2017an alemaniarra PKKra batu zen eta Medyako defentsa gunean erail zuen armada turkiarrak geroago. Berez, Turkiak hegoaldeko Kurdistana -Iraken- hainbat militarrekin inbaditu du PKKren aurka borrokatzeko. Hegazkinen bonbardaketek 2018ko abenduaren 14an hil zuten Michael, baina, argitu ez duten arrazoiak direla medio, duela gutxi arte ez dute jakinarazi bere kideek informazioa.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide