aiaraldea.eus

Ostiralean amaitzen da Erauntsi dantza taldera batzeko epea

Erabiltzailearen aurpegia Txabi Alvarado Bañares   Kultura  Urduña

Tradizioa eta dantza modernoa uztartuko dituzte ikastaroetan.

Ostiralean amaitzen da Erauntsi dantza taldera batzeko epea
Dantzaplazak egingo dituzte Erauntsi taldekoek, besteak beste. / Urduñako Udala | Ikusi handiago | Argazki originala

Ostiralean -irailak 20- amaituko da Erauntsin matrikulatzeko epea. Adin eta ezagutza maila guztietarako ikastaroak eskainiko dituzte Urduñako dantza taldean. Haurren kasuan, baina, adin minimo bat eskatuko da: 2014. urtean jaiotako umeak izango dira batu ahalko diren gazteenak.

Interesdunek Gran Via kaleko 10. zenbakian dagoen lokalera jo beharko dute, ondorengo ordu tarte hauetako batean: 16an eta 18an 18:30etatik 20:00etara eta  20an 18:00etatik 20:00etara.

Ikastaroaren helburuetako bat “tradizioa mantentzea” da, Ainhoa Gutierrezek azaldu duenez. Hala ere, “dantza modernoa” ere irakasten dutela nabarmendu du Erauntsiko kideak, “Korrontzi taldeak egiten dituenaren antzekoak”.

Ikasturterako plana
120 kide baino gehiago aritu ziren aurreko ikasturtean, eta oraingoan beste horrenbeste animatuko direla uste du Gutierrezek, “zenbakiak aldatu ahal diren arren”. Agenda betea dute Erauntsiko kideek. “Ekintza asko egiten ditugu. Nagusien egoitzara joango gara dantzatzera eta dantza-poteak eta erakustaldiak ere antolatuko ditugu”. Horrez gain, egitasmo berezi bat prestatzen ari dira abendurako: “kanpoko talde bat etorriko da Urduñara dantzatzera, elkartruke moduan”.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa