Urduñako Kultura Etxeko fatxada margotzeari ekin dio udalak. Oraintsu hasi dituzte lanak. Itziar Biguri Ugarte alkateak Aiaraldea hedabideari azaldu dionez, hiriko artista batek berrituko ditu hormak, Jose Luis Abajo "Porrilló"-k: “Foru plazako arkupeetan ere osatu zuen margolana”. Urduñakoa izan arren, nazioartean ere aritutakoa da irudi egilea, “New Yorken ere erakusketak eginak ditu”.
Hala, Abajori esleitu diote Urduña Hiria Museoaren kanpoaldea itxuraldatzeko lana, eta hilabeteko tartean espero dute bukatzea. “Oso koloretsua izango da, modernoa”, aurreratu du alkateak. Ez da Urduñako guneak atontzeko azkenaldian egindako proiektu bakarra; Harakin kaleko horman hiriko iragana oroitarazteko murala osatu baitzuten.
Margolari esanguratsua
Porrilló ezizenarekin sinatzen ditu urduñarrak haren sorkuntzak. Urteak daramatza langintzaren puntan, erakusketa ugari antolatu baititu 1974az geroztik. Japoniako Osakako XXVIII. Nazioarteko Gen Ten Erakusketan Bikaintasunaren ziurtagiria jaso zuen, besteak beste; eta urtebete beranduago Ohorezko domina eman zioten jaialdi berean. Frantzian ere aurkeztu ditu bere lanak, Bordeauxen kasu.
Beste kontinenteetan ere utzi du arrastoa: 1997an New Yorkeko Montserrat Galerian izan zen, eta 1998an Mexikon egon ziren ikusgai bere sorkuntzak. Edozelan ere, margogintzan bezala, eskulturan ere aritu da.