aiaraldea.eus

Kataluniako bi dantza talde arituko dira Urduñan abenduaren 8an

Erabiltzailearen aurpegia Julen Solaun   Kultura  Urduña

Herrien arteko Folklore Jaialdia egingo dute hirian. Tarragonako eta Lleidako dantza talde bana egongo dira kalejira eta erakustaldia egiten. Urduñako Erauntsi taldea ere arituko da eurekin batera.

Kataluniako bi dantza talde arituko dira Urduñan abenduaren 8an
Erauntsi dantza taldeko kideak artxibo irudi batean. / Aiaraldea.eus | Ikusi handiago | Argazki originala

Kataluniako bi dantza talde Urduñan arituko dira abenduaren 8an, Herrien Arteko Folklore Jaialdian. Tarragonako Esbart dansaire eta Lleidako Colla Santa Maria de Mijaran taldeek parte hartuko dute topaketan, Urduñako Erauntsi dantza taldearekin batera.

Bi ekitaldi antolatuko dira igande goizean Urduñan. Kalejira egingo da lehenbizi eta, amaitu bezain laster, dantza erakusketa hasiko da frontoian. Erauntsiren idazkariak, Ainhoa Gutierrezek, jakinarazi du talde kataluniarrek eta Erauntsikoek kale desberdinetan zehar egingo dutela kalejira eta frontoian elkartuko direla, erakustaldia egiteko.

Talde katalanen folkloreak desberdinak izango dira, Gutierrezek aurreratu duenez. Erauntsi taldeak, bestalde, bere folklorea prestatzen ari da dagoeneko, “tradizioaren eta modernitatearen” arteko nahasketa bilatzen, “kataluniarrei erakutsi ahal izateko”.

Folklore jaialdia
Herrien arteko Folklore Jaialdiaren 23. edizioa izango da aurtengoa. Jaialdiak hiru eguneko iraupena du, bat musikara eta beste biak dantzara dedikatuak.

Hasiera batean dantzaldi batzuk Bilbon egiten ziren baina, duela urte batzuk, Bizkaiko beste herri batzuetara zabaldu zen ekimena. Beraz, aurten antolakuntza Erauntsirekin harremanetan jarri zen eta topaketa Urduñan gauzatzea erabaki zuten.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa