Urduñako EH Bilduk gogoratu du Alfredo de Miguel, Arabako EAJren buruzagi ohia eta Orduñako Industrialdea sozietateko arduradun izandakoa, eroskeria eta prebarikazioa direla eta hamahiru urteko kartzela zigorrera kondenatu dutela. Nahiz eta Urduñan ezer ilegalik egin zuela ez den frogatu, egotzitako karguak garai berberekoak dira. Gauzak hala, De Miguelek hirian izandako papera argitzea eskatu die talde indepedentistak jeltzaleei.
Era berean, sozietate horretan garaiko alkateak eta beste zinegotzi batek parte hartzen zutela gaineratu du EH Bilduk. Ildo beretik jarraitu du talde politikoak, eta “udalerriko sustapen industriala mafia baten esku utzi izana” Urduñako biztanleek ordaindu behar izan dutela gehitu du. Horregatik, Euskal Herrian inoiz egondako “ustelkeria sarerik handienaren” kostua argitzea eskatu dute.
Orduñako Industrialdea sozietatearen gerente gisa hainbat lan egin zituen De Miguelek 2005eko abuztuaren eta 2008ko otsailaren artean. “Enpresei orube judizialak eta pabiloiak saltzea” zen erakunde horren xedea, EH Bilduk gogora ekarri duenez.
De Miguelek Jon Iñaki Echabururen Urbanoma Consulting enpresa ere erabili zuen Miñanon (Gasteizeko kuadrillako herri bat) aholkularitza kontratuak izenpetzeko 2006ko uztailean, "milioika euro desbideratuta, Urduñan izandako jokabide berberarekin".