Datorren larunbatean -urtarrilak 18- ospatuko da Urduñako Gaztetxe Eguna. Egun osoko egitaraua prestatu dute, hainbat ekintzarekin. Frontenis eta pilota txapelketak, “rally-poteoa”, bazkaria, mus txapelketa eta euskal karaokea egongo dira goizetik arratsaldera bitartean.
Gauean, aldiz, musikak hartuko du protagonismo osoa. Kontzertu berezi bat egongo da, Itxaropen Zikiña talde urduñarra oholtzara igoko da berriz, ia sei urte jo gabe egon ostean. Urduñako Gaztetxean eskaini zuten, hain zuzen, azken kontzertua, 2014an:
Taldekideetako bat atzerrira joan zen bizitzera eta horregatik utzi zioten jotzeari. Hala ere, oraindik ez dakite itzulera hau kontzertu bakarrerako edo emanaldi gehiagorako izango den. Gauzak hala, larunbatekoa izango da Urduñako taldearen punk doinu bortitzez gozatzeko egongo den aukera bakarra, momentuz.
Okher rap abeslari laudioarra eta Dantzetan Jarrai musika jartzaileak arduratuko dira gauari amaiera emateaz.
“Urduñako ahalik eta gazte gehien parte hartzea”. Hori da aurtengo Gaztetxe Egunarekin lortu nahi dutena. “Egindako jardueren inguruan hausnartu dugu eta herriko gazteekin harremanetan jarri gara txokoz txoko pasatzen, haien nahiak eta iradokizunak bilduz”, azaldu dute Urduñako Gazte Asanbladako kideek. Hainbat motatako jarduerekin hornitu dute larunbateko egitaraua, “gazteen artean dagoen aniztasuna” kontuan hartzeko eta eguna bera “ahalik eta jende gehiagorentzat erakargarria izateko”.
Asanblada, indartsu
Gazte Asanblada indartu nahi dute horrela. Azaldu dutenez, Gazte Asanbladan belaunaldi aldaketa egon behar zen duela urte batzuk, baina ez zen horrela izan. “Jende nagusia asanbladatik joan zen eta gazteen partaidetza nahikoa ez zen lortu. Taldearen indarra galtzea ekarri zuen horrek, ekintzak burutzeko gaitasuna ahulduz”, aitortu dute gazte eragileko kideek. Hala ere, gaineratu dutenez, errealitatea asko aldatu da orain, “ideia berriak” dituzten “gazte anitzek” osatzen dutelako asanblada. “Gainera, jendea berria izanda partaidetza indartuz joan da eta gogoz betetako asanblada eraiki dugu”.
Hurrengo geltokia: Gazte Eguna
Gaztetxe Eguna pasata, Gazte Egunari begira jarriko dira asanbladako kideak. “Ezinbestekoa ikusten dugu kuadrillen arteko elkarlanean indartze bat ematea. Horregatik, Gazte Egunaren antolaketa bera ere Urduñako edozein gazterentzako espazio natural izatea lortu nahiko genuke”.
Otxomaioetan ere eragin nahi dute. “Egitarau oparoago bat osatzea gustatuko litzaiguke, kuadrillek ere pisu berezi bat izan dezaten bertan urteetan egin diguten eskaerari erantzunez”. Txosnagunean aldaketak egitea aztertzen ari dira horretarako.