aiaraldea.eus

Urduñako III. Berdintasun Plana abiatu dute jadanik

Erabiltzailearen aurpegia Julen Solaun Martinez   Jendartea  Urduña

Urduñako Udaleko 2020-2022 tarteko emakumeen eta gizonen arteko berdintasunaren aldeko plana abian dago jada. Udalak azaldu dutenez, dokumentu horren helburua “ biztanleen egungo eskakizunetara, interesetara eta beharretara” egokitzea izango da, “berdintasuneko gizarte batera hurbiltzeko urrats bat gehiago emateko”.

Urduñako III. Berdintasun Plana abiatu dute jadanik
Ekintza ugari barnebildu dituzte planaren barruan. / Urduñako Udala | Ikusi handiago | Argazki originala

Proposatutako iniziatibak lau atal nagusitan banatuko dira: “Ekonomien eraldaketa eta antolaketa soziala, emakumeen kontrako biolentziarekin amaitzea, emakumeen ahalduntzea eta gobernu ona”.

Ekonomien eraldaketa eta antolaketa sozialari dagokionez, hezkuntza zentroetan eta enpresetan gizon eta emakumeen arteko berdintasun kultura bultzatzeko neurriak hartuko dira udaletik. Era berean, kontziliaziorako, estereotipoak hausteko eta emakumeentzako lanbide eta ikasketa espezifikoak sustatzeko ekimenak bultzatuko dira, besteak beste.

Emakumeen kontrako biolentziarekin amaitzeko, gizonezkoek ekintzetan parte hartzea bilatuko dute ere. Sentsibilizazio kanpainak, hiriko puntu beltzen maparen osaketa eta biolentziaren prebentzio lanak izango dira hiru urte hauetako ildo nagusietako batzuk.

Ahalduntzerako, berriz, hainbat jarduera eskainiko dira perspektiba feminista bermatuta, Urduñako zerbitzuak “benetako beharretara” egokitzea, eta emakumeen paperaren errekonozimenduarekin jarraitzea izango dira beste erronketako batzuk.

"Gobernu ona" lortzeko, hizkuntzaren eta irudien erabilera ez sexista egitea, udaleko zerbitzuentzako formazio sesioak burutzea, berdintasun organoak indartzea eta teknikariak eta politikariak trebatzea aurreikusi dute, besteak beste.

Lehenengo plana 2009an onartu zen, baina “inflexio puntua” 2012ko bigarren plana izan zen, udalak azaldu duenez. Azken horrek, printzipioz, 2015 eta 2017. urtetarako balio beharko zukeen, baina 2019ra arte luzatu zen.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa