Udako solstizioaren bueltan antolatzen dute urtero San Juan azoka Urduñan. Aurten, ordea, koronabirusaren ondorioz, ez da azokarik egongo. Zilarrezko Perretxikoa sariaren bidez, berriz, pertsona bat omendu izan dute urte guztietan zehar. Euskadiko Txarolesa Behi Arrazen txapelketa ere egin izan da hiri bizkaitarrean, ospe handiko ekimena. Halaber, artzain txakurren lehiaketa egin izan dute Juan Garay auzuneko landetan.
Olaran elkartea arduratzen da, batik bat, ekimenaren prestaketaz. Jon Solaun da kideetako bat. "Bertan behera utzi behar izan dugu aurtengo festa, zaila zen ganadua eta postuak kokatzea, 6 metroko distantzia eskatzen baitzuten, eta 1-2 laguneko aforoa errespetatu behar zen saltokika".
Sektorearekin hitz egin ostean, eragozpen asko zituztelako bota zuten atzera ospakizuna: "Horrelako egunetan, gainera, jendetza batzen da". Horren adibide da azoka eguneko otordua, "270 laguneko bazkaria egiten genuen Josefinoetan ere, eta ezinezkoa zaigu segurtasun distantziak betetzea".
Alabaina, datorren urteari begira baikor daude, "lehen sektorearentzat eta ostalaritzarentzat bultzada garrantzitsua da San Juan azoka. 2.000-2.500 lagun inguru elkartzen dira, eta 400-500 abere". Zerrenda horri, gainera, tokiko ekoizle eta artisauena gehitu behar zaizkio.
"Datorren urtean azokaren potentziala indartuko dugu, aurtengo kolpea leuntzeko", erantsi du urduñarrak, "pena handia eman digu San Juan azoka ezin egiteak, ibilbide eta ospe handia baitu. Egoerak eraman gaitu horrelako erabakiak hartzera".