Aurten ez da Urdufolk lehiaketarik egon. Alabaina, jaialdia "ahal bezala" antolatzea lortu dute zortzigarren urtez, 2013. urtean izan baitzen lehen aldia. Ohikoan ez bezala, ordea, ez dute lehiaketarik ez kalejirarik antolatu. Bai, ordea, folk kontzertuak. Hain zuzen, Urduñako Herri Eskolako patioan izango dira emanaldiak.
Ez edonolakoak, gainera. Batetik, Iñaki Plaza urduñarrak joko du, zenbait gonbidaturekin.
Iñaki Plazaz gain, Amak taldea taularatuko da: Alaitz Telletxea, Maixa Lizarribar, Amaia Oreja eta Kris Solano
Bestetik, Amak taldea ikusteko aukera izango da hiri bizkaitarrean, musikari emakume ezagunek osaturiko taldea.
Izan ere, musika bikote ezagunetan ibilitako kideak bildu dira proiektuan, Alaitz eta Maider zein Maixa eta Ixiar taldeetakoak kasu. "Lau soinu, lau pandero, lau ahots eta lau emakume. Alaitz Telletxea, Maixa Lizarribar, Amaia Oreja eta Kris Solano", sare sozialetan zehaztu dutenez.
Ate irekiera 20:00etan izango da "20:30ean hasteko Iñaki Plaza eta Koldo Uriarte bikotearen kontzertua, eta 22:00etan Amaken ikuskizuna". Joseba Urruelaren hitzetan, gauerdirako amaituta egongo da jarduera: "23:30ean bukatuko da, eta 0:00etarako jende guztia eremutik kanpo egon beharko da. Boluntarioen esanetara, modu ordenatuan bideratuko dugu sarrera-irteera, jendea ez dadin une berean atera eta sartu".
Gonbidapenak eskuratzea, derrigorrezkoa
Koronabirusak eragindako pandemiaren ondorioz, derrigorrezkoa izango da Urdufolkeko ikus-entzulea izateko aurrez apuntatzea. Kontzertuetako edukiera eta segurtasuna kontrolatzeko, beharrezkoa da Alondegian izena-ematea, "gonbidapenak erreserbatzeko".
Urruelak erantsi duenez, izen-abizenak eta telefonoa adierazi beharko dira, partaide guztiekin harremanetan jartzeko modua izateko arazoren bat egongo balitz. "300 aulki jartzeko tokia lortu dugu, segurtasun distantzia bermatuta", azpimarratu du urduñarrak.
Kontzertuetako aforoa eta segurtasuna kontrolatzeko, beharrezkoa da Alondegian izena-ematea
Goizez nahi dute sarrerak kudeatzea, "asteartetik ostegunera printzipioz. Ostiralean txartelak oraindik "soberan" baleude Alondegian bertan jarriko dituzte eskura, eta posta elektroniko bidez (alondegia@urduna.com) ere eskatu ahalko dira".
Edukiera bete arte onartuko dute jendea, aipatu duenez, "jende guztiak eserita egon beharko du behin eremuan sartuta, eta maskarillarekin. "Elkarrekin 2-6 lagunen arteko multzoak egon ahalko dira, baina soilik familia unitate badira; hau da, etxe berdinean bizi badira".
Horretarako ordutegia ondorengoa izango da: 10:00etatik 13:30era, eta 16:30etik 20:30era, "irailaren 1etik aurrera Gizarte Etxeak ordutegi berria izango du" eta, udalaren hitzetan.
Koroatze jaiak bertan behera
Koroatze jaiei dagokienean, berriz, ekitaldi guztiak bertan behera geratu dira, Urduñako Udalak ostiralean jakinarazi zuenez. "Urdufolk izango da egingo den jarduera bakarra", azpimarratu zuten prentsa oharrean.
Horrez gain, tradizioari jarraiki, mezak mantenduko dira, eta jaietan moduan irrati bidez entzun ahalko dira herrian. Prentsa oharrean kontsulta liteke informazio guztia.