Protokoloak sortu behar izan ditu Urduñako parapente eskolak kirola praktikatzen jarraitzeko. Maiatzetik urrira luzatu ohi da euren denboraldia, eta aurtengoan ere ez dute hutsik egin.
Asteburuan, esaterako, piloto mordoa elkartu zen Gorobel mendizerran zein Tertangako lur-hartze zelaian, Fili arduradunak sare sozialetan aitortu duenez.
Covid-19 birusak parapentea zenbateraino baldintzatu duen galdetuta, denboraldi hasieratik mugatu zituztela klaseak dio: "Martxotik urrira da normalean gure denboraldia, beraz, maiatza aldean hasi ginen neurriekin: eskuen garbiketa, maskarillen erabilera, material guztia ondo desinfektatzea...".
Salatu dutenez, "euren gain" hartu behar izan dute ardura guztia, erakundeek ez baitiete inolako laguntza edo gomendiorik eman. Dena den, eskolen arteko komunikazioa bermatu dute, "horren arabera saiatu gara ahalik eta ondoen zaintzen guztia".
Bete-betean harrapatu ditu "hegalariak" pandemiak. Horrek, ordea, ez die funtzionamendua eragotzi: "Gure ingurunean oso garrantzitusa da hegaztien babesgunea ere ondo zaintzea". Hargatik, ohituak daude ekintzak mugatu edo egokitzera.
Horrenbestez, aurrerantzean ere "hegan" jarraitzeko asmoa agertu dute, "baita biplazak egiteko gogoak dituzten lagunekin ere".
Argazkiak: Fili Fil