Greba deitu duzue gaurko -urriak 21- ELA, LAB, UGT eta CCOO sindikatuek hezkuntza zentroetako jangeletan. Zer dela eta?
Aurreko kurtsoa amaitu baino lehenago Eusko Jaurlaritzatik protokolo bat aurkeztu zuten, eskola bakoitzak jantokiak zein klaseak bere kabuz antolatu behar zituela esanez.
Jantokietako langileek ekainetik daramagu Eusko Jaurlaritzari gurekin biltzeko eskatzen, jantokiko protokoloa nola antolatu ahal zen eta zer behar dauden zehazteko. Baina erantzunaren zain gaude oraindik.
Gu oso parte garrantzitsua gara hezkuntza komunitatean baina askotan ikusezinak garela sentitzen dugu, jantokiko gauzak gurekin kontatu gabe antolatzen baitira.
Ikasturte berria hasi zen eta eskola askotan jantokia itxita zegoen, Gasteizen batez ere. 400 pertsona langabezian zeuden irailean, nahiz eta aldizkako langile finkoak izan. Hilabetea aurrera zihoan heinean langileak lanpostuetara bueltatu dira pixkanaka. Jantoki batzuk oraindik itxita daude baina zabaltzeko epea jarrita. Beste batzuk, gehien bat institutuak, ikasturte honetan ez zabaltzea erabaki dute. Hori zentro bakoitzaren erabakia izan da, baina Hezkuntza Sailak badu erantzukizuna horretan. Ez dakit Eusko Jaurlaritzak ba ote dakien zenbat langile geratuko diren langabezian, edota kontzialiazioa zer den. Erabaki hori betirako ez izatea espero dugu.
Martxotik denbora soberan zeukaten dana antolatzeko baina oporretan egon direla dirudi. Penagarria da, benetan.
"Enpresek musuko kirurgikoak bidali dituzte nahiz eta Eusko Jaurlaritzak esan FFP2 motako maskarak erabili behar ditugula"
Egoera hori ikusita, nola moldatu zarete jantokiak irekitzeko?
Eskola bakoitzak ahal izan duena egin du jantokiak zabaltzeko. Gela bakoitza “talde-burbuila” bat da. Horrek esan nahi du ezin garela nahastu gure artean, ez jantokian ezta aurretik edo ondorengo patioan ere.
Eskola batzuetan, jantokiaz gain, beste gela batzuk prestatu dira umeek jateko, horrek ekartzen duen lan-kargarekin: gela horiek muntatu behar dira egunero, haraino janaria eraman, zerbitzatu, jaso, garbitu eta desinfektatu.
Beste aldetik, txandaka sartu behar gara jantokira, ez nahasteko. Bazkaltzeko denbora gutxiago egotea dakar horrek.
"Eskola batzuetan “talde-burbuila” bakoitzeko begirale bat egotea bermatzen da. Baina beste hainbat eskoletan, Eusko Jaurlaritzako ratio zaharkituak medio, lan-kargak ere areagotu dira"
Eskola batzuetan “talde-burbuila” bakoitzeko begirale bat egotea bermatzen da. Baina beste hainbat eskoletan, Eusko Jaurlaritzako ratio zaharkituak medio, lan-kargak ere areagotu dira, horrek dakarrenarekin: begirale batek talde bat baino gehiago izatea. Eskola batzuetan ezin dute jantokia zabaldu arrazoi horrengatik, ezin direlako burbuilak mantentzea bermatu.
Langileak atetik sartzen garenean gela bota eta tenperatura hartu behar dugu (37,1° edo gehiago badugu ezin gara sartu). Maskaren kontuarekin oso txarto gaude. Enpresek musuko kirurgikoak bidali dituzte nahiz eta Eusko Jaurlaritzak esan FFP2 motako maskarak erabili behar ditugula. Kontutan eduki behar dugu umeak jantokian daudenean maskararik gabe daudela, horrek guretzat dakarren arriskuarekin. Amantalak ere egunero aldatu beharko genituzke, baina pare bat ditugu orokorrean, iragan ikasturtekoak. Badirudi gure osasuna ez zaiela inporta.
Zein da egoera Aiaraldean?
Aiaraldean, Euskal Herriko hainbat ikastetxetan bezala, zuzendaritzaren erabakiaren arabera (baina azken ardura Eusko Jaurlaritzarena dela kontuan hartuta) jantoki batzuetan begiraleren bat gehiago dago, baina ez dira burbuilak mantentzeko nahikoak. Beste batzuetan gutxiago daude, langile batzuk langabezian dauden bitartean. Zabalik dauden jantokiak prekarioak baziren orain askoz gehiago. Eusko jaurlaritza entzun gure hitza! inor ez duzula atzean utziko esan duzu eta!