Asteazkenera arte -azaroak 25- luzatu dute Urduñako Aintzinako Andra Maria ikastetxean abiatutako arropa bilketa. Aita Mari salbamendu ontziko kideek abiatu dute dinamika. “DBH 2. mailako ikasleek garatu dute proiektua”, azaldu du Susana Harillo irakasleak, “irakasleetako baten lehengusua Aita Mari ontzian dabil, eta modu horretan sortu zen ekimenean parte hartzeko ideia”.
Beste hainbat ikastetxek ere hartu dute parte egitasmoan. “Sarea” osatu dute guztien artean, eta zentro bakoitzak arropa zehatz batzuk biltzeari ekin dio. 400 “aita kit” sortzea da ekimenaren xedea. Mediterraneoan erreskatatzen dituzten pertsonei ematen zaie kit hori, eta ondorengo elementuek osatzen dute: motxila, txankletak, barruko arropa, kamiseta, txandal prakak, izerditakoa, oihala eta plastikozko edalontzia.
“Guri helduentzako txandal prakak biltzea egokitu zaigu”, zehaztu du Harillok. Gauzak hala, jantzi mota horiek biltzeari ekin diote. Bilketa azaroko lehen asteburuan egitea zen hasierako asmoa, baina luzatzea erabaki zuten berehala, izan zuen harrera ikusita. Gauzak hala, asteazken honetara arte egongo da txandal praken dohaintzak emateko aukera. Bi bilketa puntu atondu dituzte horretarako: eskolan bat eta Antiguako elizan bestea.