Amabirjinaren monumentuak egin du ezagun Txarlazoko tontorra. Urduña ikusten da bertatik, eta ordubete inguru behar da tontorrera iristeko. 933 metrora dago mendia eta ermita bat du gailurrean. Hain zuzen, 1946. urtean eraiki zen, monumentua egin zenetik 42 urtera. Izan ere, 1904. urtean osatu zuten zuhaitz adarretan sustraitutako Ama birjinaren eskultura. Ezaugarriei dagokienez, 25 metroko altuera du monumentuak.
Igoera polita bezain erraza da, adin eta sasoi fisiko orotarako egokitua. Ibilgailua Urduñan utzi daiteke, edota Antzinako Santutegiko aparkalekuan. Azken urteetan, gainera, seinaleztatu egin dute bidea, eta aparkaleku propio bat egokitu dute bidearen hasierako zelaigunean.
Hala, zigi-zagaka altuera hartzen joango da bidaidea, basoa zeharkatuz, Gualdetxuko iturrira iritsi arte. Hortik oso gutxira estutu egiten da bidea, eta hesi bat dago. Bertatik ezkerretara eginez gero, Txarlazora joaten da; eta, eskumako bidea hartuta, Txolopera.
Txolope, Txarlazoren ezker beso
Aldapa motza eta ikuspegi zabala dira Txolopeko ezaugarrietako bi. Txarlazo behealdean utzita, Arrastaria, Urduña eta Aiarako lurrak bistaratzen ditu. Gorobelen ertzetik doa ibilbidea, eta Txolopeko aterpea du gordeta, besteak beste. Hala ere, egun hesitua dago, eta ezin da sartu.
Txarlazo ezkerrean utzita, 20 minutu inguru behar dira Txolopera iristeko. 1.027 metro ditu, baina txikiena ere handi sentiarazten duen toki horietako bat da.