Melis tabernan aurkeztu dute gaur Urduñako Zaporeak elkarteko kideek eskualdeko baserritarren produktuak online saltzeko prestatutako web orrialdea. Bezeroei zerbitzu zuzena eskaintzea da proiektuaren helburua, "eskualdeko merkatuetan edota denda txikien bitartez erosi ezin badituzte, produktuak etxean jaso ahal izateko.
Intervegas taldeak sustatutako Espainiar Estatuko 'Huerta Proxima' ekimenaren barruan kokatuta dago proiektua. Ekimenak beharrezkoak diren baliabideak eskaintzen dizkie tokiko ekoizleei, euren produktuen salmenta zuzena egin dezaten.
Bide urratua
Urduñako proiektuaren ernamuina, baina, lehenagotik dator. COVID-19ak eragindako pandemiak baserritarren merkatuak itxiarazi zituen, eta egoerari buelta emateko asmoz WhatsApp taldea jarri zuten abian Urduñan, baserritarren produktuen salmentak aurrera jarrai zezan. Talde horren arrakastatik egin dute salto plataforma digital berrira.
Atariak 8 baserritarren produktuekin ekin dio ibilbideari, baina espero dute tokiko ekoizle gehiago batzea hurrengo aste eta hilabeteetan.