2021eko urtea ere berezia izango da guztiok ezagutzen ditugun arrazoirengatik, eta Orduñako herrian ere berezia bada aratuste-martitzen osteko domeka, Lapiko Domeka (‘Domingo de Piñata’). Egun horretan Getxa Goi Txistu taldeak hamar urtetik hona antolatu duen txistu kontzertua (eta kontzertu osteko kale animazioa) ezin izan du ospatu, egoerak behartuta.
Hala ere, hiriko morroi eta otseinentzat bereziki eginiko antzinako jai hura molde berriekin ospatzea (edo gogoratzea behintzat), proposatzen digu Getxa Goik, Facebook-eko bere kontuan sareratutako bideoarekin. Bertan, hamar urteetan egindako lanaren laburpena ekartzen digute argazkietan baturik, baina ez nostalgiagatik, euren argitalpenean esaten dutenez “urrunago helduko gara pausu bat atzera emanik indarra hartzeko...”
Horrekin batera, eguneko egitaraua aurrera ateratzeko izan duten laguntza eskertzeko aprobetxatu nahi izan du Txistu taldeak, bai urteetan zehar egon diren musikari ugariena eta baita bestelako laguntza eman dieten pertsona guztiena, bereziki urte honetan joan direnen laguntza.