Entzungai dago dagoeneko Eriz & Lainopilak proiektuaren lehen singela: Aizu!. Eriz Perezek abiatu du proiektua. Duela bost urte hasi zen abesti propioak konposatzen, baina orain arte ez du tarterik izan proiektu pertsonal hau garatzeko. “Denbora asko daramat eszenatokietan, baina beti egon naiz talde batean edo beste artista bakarlari batzuetzat lanean”, azaldu du musikari urduñarrak, “baina gogoak nituen abesti batzuk egin eta probatzeko”.
Bi gauza hasieratik izan ditu argi Perezen. Lehena, musika estiloa. “Disko rockeroa egin nahi nuen, 'gitarreroa', soloz betetako abestiekin, freskoa, funkya”. 90. hamarkadaren hasieran egiten zen musikaren ildoa jarraitzen du Eriz & Lainopilak proiektuak. “Spin Doctors, Red Hot Chili Peppers eta antzeko taldeen estiloari jarraiki”.
Hizkuntza-hautua da proiektuaren bigarren ezaugarri nagusia. Perezek argi zuen euskaraz abestu nahi zuela. “Nire bizitza euskaraz egiten dut eta koherentea iruditzen zitzaidan horrela egitea, nahiz eta erreferentzia gehienak estatu batuarrak edo ingelesak izan”.
Lagunekin
Hirukotea osatu du Perezek proiektua garatzeko. Kepa Calvo eta Alex Lopez dira bere “laino opilak”. Lagunak dira biak, eta hainbat proiektutan kointziditu du eurekin.
Diskoa, udazkenean
Ostiralean igoko da hirukotea lehenbiziko aldiz oholtza gainera. “Emanaldi horri begira atera dugu singlea”, azaldu du Perzek- Abuztuan, aldiz, diskoa grabatzea aurreikusi dute. “7 kanta ditugu konposatuta. Datorren hilabetean grabatu nahiko genuke, urria aldera argitaratu ahal izateko”.