Urduñako Mendi Duatloiaren edizio berri bat ospatu zen iragan irailaren 18an Gorobeleko baso eta gailurren artean. La Txozako gainetik abiatu ziren korrikalariak, iazko edizioan egin bezala.
Hain zuzen ere, 2020ko edizioan hartutako neurri asko mantendu dituzte antolatzaileek, pandemiak markatutako garai batean ere kirol proba bat antolatzea posible dela demostratuz.
Ibilbidea hiru zatitan banatu zuten: Lehenbizi, 7 kilometro egin behar izan zituzten parte hartzaileek korrika. 15 kilometroko BTTko tartea osatu zuten gero. Bukatzeko, lasterketaren azken 1,5 kilometroak korrika egin zituzten kirolariek berriro ere.
Sailkapena
Sailkapena bi modalitatetan banatu zuten: indibiduala eta errelebo lasterketa. Lehenengoek, korrika zein bizikletan, osorik egin zuten 23,5 kilometroko zirkuitua. Bigarrenek binaka hartu zuten parte; bikotekide batek bizikletan eta bestea korrika.
Jon Durana Aiaramendi taldeko kidea izan zen kirolaririk azkarrena, ibilbidea ordu eta hogeitalau minututan osatuz. Emakumezkoetan Enara Oronoz izan zen azkarrena 1:45:19ko markarekin. Errelebokako sailkapenean Ibon Ruid de Alda eta Hugo Teixeira igo ziren podiumeko lehenengo postura, ibilbidea ordu bete eta hogeitabederatzi minututan osatu ostean.
Kluben sailkapenean Aiaramendi izan zen garaile, Jon Duranen lehenengo postuaz gain Isasi anaiek hirugarren eta zortzigarren postuak eskuratu baitzituzten.
Argazkiak: Endika Diaz Garcia