ARGAZKI KRONIKA

400 kirolari baino gehiago elkartu ditu Urduñako Mendi Lasterketak

Urduñako Mendi Lasterketaren IV. edizioak ehunka kirolari eta zaletu batu ditu Gorobel magalean. Javier Goitia eta Zutoia Odriozola izan dira 33 kilometroko frogan azkarrenak.

Ehunka kirolari eta beste hainbeste zaletu elkartu dira gaur goizean Urduñan, Gualdetxu taldeak antolaturiko Urduñako Mendi Lasterketaren IV. edizioaz gozatzeko. Gutxika bueltatzen ari dira kirol proba handiak eskualdeko egutegira, eta gaurkoa horren adibidea izan da.

Herriko dantzarien agurra jaso ostean, 33 kilometroko lasterketa osatu behar zuten kirolariak izan dira Foru Plazatik abiatzen lehenak. Fraileburu azpitik igo dira Txarlazora. Lehenengo gailur hori igaro ostean, Txoza iturri aldera jaitsi dira ziztu bizian lasterkariak, bertatik berriro ere gora egiteko.

Lasterketa erreleboka egin behar zutenek bertan eman diote lekukoa kideei. Bigarren igoera hau Bedarbideko malda ikusgarrietatik egin dute; herrira itzulera, aldiz, Senda Negra bidetik.

Javier Goitia izan da gizonezkoen kategorian azkarrena, ibilbide guztia 2 ordu eta 48 minututan osatu du. Lehia bizia izan da azken momentura arte, ordea. Izan ere, Julio Salazarrek Goitiak baino segundo bat beranduago gurutzatu du helmuga.

Emakumezkoen kategorian Zutoia Odriozola elorrioarra igo da podiumeko lehen postura. Errelebotan Ander Isla eta Josu Isasi izan dira garaile, bikoteak 2 ordu eta 56 minutu behar izan ditu lasterketako 33 kilometroak osatzeko. Esteka honetan kontsultatu daitezke emaitzak.

13 kilometroko lasterketa

Lasterketa nagusia baino ordu erdi beranduago abiatu dira 13 kilometroko lasterketako parte hartzaileak. Norgehiagoka bizia eta oso azkarra izan da. Ibai Perez igo da podiumeko lehen postura, 58 minutu eta 9 segundoko markarekin. Eskualdeko azkarrena Jon Maeso laudioarra izan da, eta hirugarren postua eskuratu du. Lore Moyua zarauztarra izan da emakumezkoetan lehena.

Argazkiak: Aimar Gutierrez Bidarte eta Endika Diaz

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide