Munduko 300 lisaburdin, Orduña Hiria museoan ikusgai

Ostiralean inauguratuko da erakusketa. / Orduña Hiria Museoa

Carlos Uzkiano delikarraren bilduma egongo da ikusgai museoan datorren urteko ekainera arte. 

‘Munduko antzinako lisaburdinak’ erakusketa inauguratuko dute Orduña Hiria Musoean datorren ostiralean, abenduak 17. Carlos Uzkiano delikarrak bere bilduma pertsonala eramango du erakusketa-gunera, eta datorren urteko ekainaren 26ra arte egongo da bertan.  

Ia 1.000 lisaburdin bildu ditu Delikako bizilagunak, munduko bost kontinentetakoak eta hainbat garaitakoak. Horietako 300 aukeratu ditu erakusketa atontzeko. Uzkianok ia 50 urte daramatza zaletasun hori garatzen, bere familiaren baserriak sua hartu zuenetik. Bi lisaburdin erreskatatu ahal izan zituen bertatik azken momentuan, eta hortik datorkio grina. 

Historian barrena

Lisaburdinaren historia ezagutzeko aukera izango du museora bertaratzen denak. Egiptoarrek, grekoek eta erromatarrek harrizko eta burdinezko tresnak erabiltzen zituzten arropa lisatzeko. Erdi Aroan, aldiz, ikatzarekin funtzionatzen zuten lehen gailuak sortu ziren, eta ondoren etorri ziren ura, alkohola edota gasa baliatzen zutenak. “Euskal Herrian ere eman zen bilakaera hori. Horregatik, bildumak zonaldeko hainbat ale ditu, etxeetan eta baserrietan nola erabiltzen ziren erakusteko”, azaldu dute museoko kideek, “industria metalurgikoak tresna horien ekoizpen eta garapenean izandako inplikazioa ere du hizpide erakusketak”.

Asteburuko ikusgai

Erakusketa asteburuetan eta jaiegunetan egongo da ikusgai, abenduaren 25 eta 31n izan ezik. Ostiraletan 17:00etatik 20:00etara bisitatu daiteke. Larunbatetan  11:00etatik 14:00etara eta 17:00etatik 20:00etara egongo da zabalik. Igande eta jaiegunetan, aldiz, goizeko ordutegian soilik ikusi ahalko da. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide