CD Orduñak indar berriekin hasi du urtea. Izan ere, urtarrilaren 2an erronka zaila izan zuen Arbieton eta modu positiboan gainditu zuen. Hain zuzen, igande horretan Athletic Clubarekin neurtu zituen indarrak. Angela Vadillo jokalariak hala azaldu du: "Partida gogorra izango zela aurreikusi genuen. Lehenengo itzulian 9-0 irabazi ziguten eta".
Aurrekariek, ordea, ez zituzten urduñarrak kikildu eta markagailuan aurretik jarri ziren norgehiagokaren lehenengo zatian. Hala ere, bigarren zatia hasi eta gutxira, zurigorriek berdintzea lortu zuten. Golak ez zituen Urduñakoak hondoratu eta 2-1 egin zuten. Partida amaitzeko 15 minutu falta zirenean, Athleticek berdindu zuen eta 2-2 bukatu zen lehia.
Indarrak urte berriari begira
Athletic Clubaren aurkako berdinketa lortu eta gero, CD Orduñak denboraldiko helburuak zehaztu ditu. Une hauetan sailkapenaren erdialdean dago, baina 2021/22ko joera apurtzea lortu zuen asteburuan. Bisitari moduan bere lehen garaipena eskuratu zuen Urdaibairen kontra, oso modu argian, gainera: 1-5.
Gabezia hori konponduta (2021ean Urduñatik kanpo 3 partida galdu zituzten eta 2 berdindu) eta etxeko joerari eutsita, CD Orduñak uste du igoera promozioa jokatuko duela. Izan ere, Angela Vadillok azaldu du Arbieto izan dela indarrean dagoen denboraldiaren gotorlekua: "Etxean partida guztiak irabazi ditugu, bat salbu, Athleticen aurka izandako berdinketa, alegia".