Gualdetxu Mendi Bizikleta eta Trail Taldeak antolatutako Urduñako Mendi Lasterketaren edizio berria datorren azaroaren 13an egingo dute. Hala iragarri dute antolatzaileen sare sozialetan. Lasterketa puntuagarria izango da Euskal Mendizale Federazioaren Koparako. Izen emateko epea maiatzaren 1ean irekiko dute.
Urduñako Mendi Lasterketan izen emateko epea maiatzaren 1ean irekiko dute
Bi ibilbide aurkeztu dituzte, eta datozen hilabeteetan emango dituzte hauen gaineko zehaztasunak, baina aurreratu dute Gorobel mendilerroan barrena arituko direla kirolariak. Lasterketa laburrak, 13 kilometroko luzera eta 450 metroko desnibel positiboa izango du; bestea, aldiz, 33 kilometroko ibilbidea izango da, 1.750 metroko desnibel positiboarekin. Lasterketa luzearen kasuan, erreleboka egiteko aukera egongo da ere.
Ibilbide luzeko lasterketa
Azaroaren 17koa Urduñako Mendi Lasterketaren V. edizioa izango da. Egitasmoa 2017an abiatu zuten Urduñako Mendi Maratoiaren estreinako edizioarekin, eta 2018an errepikatu zuten formula.
Pandemiak ez zituen antolatzaileak gelditu, eta Txolope gailurrera igoera bertikal batekin ordezkatu zuten 2020an ospatu beharreko IV. edizioa. Neurri murriztaileek, ordea, kirol froga bertan behera utzi zuten azken unean. Iaz berrartu zuten urteroko zita, 2021eko azaroaren 14an.