Espainiako Mendi Federazioaren Alpinismo Taldeko kide berria izango da aurrerantzean Tasio Martin kirolari urduñarra. 14 gaztek parte hartuko dute guztira FEDMEko talde berrituan, 2024ra arte.
Sailkapen frogak
Iragan otsailaren 25etik otsailaren 27ra egin zituzten Espainiako Alpinismo Taldean sartzeko frogak. 16 mutilek eta 16 neskek hartu zuten parte Panticosan (Huesca) egindako topaketan.
Selekzioan parte hartzeko hautagaiek asteburu zorrotzari egin behar izan zioten aurre. Larunbat goizean erresistentzia eta mendiko eski probak egin zituzten. Arratsaldean, berriz, eskaladarako gaitasunak neurtu zituzten Gratal mendiaren magalean. Igandean egin zuten sailkapen faseko azken ahalegina: izotz eta eskalada mixto proba Canal Roya mendian.
FEDMEk aste hasieran iragarri ditu azterketa gainditu duten hautagaien zerrenda. Gauzak horrela, 21 urteko urduñarra alpinismo taldearen parte izango da bi urtez, Mikel Zabalza mendizalearen gidaritzapean.
Mendizaletasunari lotua
Eskarmentu handia dauka Martinek mendian eta honi lotutako hainbat diziplinatan. 2017an boulder liga irabazi zuen, eta 2019an Ama Dablam mendira egin zuen espedizioa, aitarekin batera.
Kataluniako Mendizale Federazioaren Alpinismoko Teknifikazio Taldean aritu da azken urtean, eta hainbat marka hautsi ditu. Horien artean dago Marokoko Atlas Garaian erdietsitako erronka. Taghia herrixka inguruko eskalada eremuko 'Babel' bidea eskalatu zuen urduñarrak, bera bakarrik. 2007an ireki zuten bide hori, baina geroztik bi aldiz bakarrik errepikatu dute, eta Tasio Martin izan zen bere kabuz igotzen lehena. 3 egun behar izan zituen Martinek 18 luzek osatzen duten 800 metroko bidea osatzeko.