Eskalada taldea sortu du Txarlazo Mendi taldeak, eta uda bukaerarako aurreikusi dute boulderra zabaltzea

Izar Mendiguren Cosgaya 2022ko martxoaren 11

Boulderra eraikitzeko prozesua abiatu dute jada. / Rocalbont

Boulderra eraikiko du Txarlazo Mendi Taldeak Urduñako Lanbide Heziketa eskolan. Txarlazo Eskalada taldea eratu dute horretarako. Eneko Calejero kideak eskuartean dituzten erronkak eta egindako pausoak azaldu ditu.

Negurako prest egongo da Urduñako boulderra. Hala espero du Txarlazo Mendi Taldeak. Elkartearen barruan, talde propioa eratu dute horretarako: Txarlazo Eskalada. Sare sozialak ere ireki dituzte, egitasmoaren nondik norakoak ezagutarazteko. Eneko Calejero ari da, besteak beste, ekimena sustatzen. "Urduñan geroz eta zaletasun gehiago dago eskalada egiteko, eta azpiegitura falta zegoen", aipatu du.

"Urduñan geroz eta zaletasun gehiago dago eskalada egiteko, eta azpiegitura falta zegoen. Arkitektua kontratatu genuen, eta diseinua prest dago jada"

Hargatik, Urduñako Udalarekin jarri ziren harremanetan, eta espazioa egokitu diete jada: Lanbide Heziketako eraikinean. Aurrez, gimnasioa izan zen toki hori.

Egun, baina, beste leku batean berkokatu dute Erauntsi taldea, eta ondorioz, eremu hori baliatuko du Txarlazo Eskalada taldeak boulderra eraikitzeko.

Proiektua, martxan

Duela urtebete ekin zioten proiektua diseinatzeari, "arkitektua kontratatu genuen, eta diseinua prest dago jada". Elkarlana, baina, ez da horra mugatzen: Amurrioko Zaraobe Institutuko ikasleak ari dira boulderreko zenbait pieza ekoizten, "gure taldeko kidea eta Zaraobeko irakaslea den pertsona baten ideia izan zen hori".

Lanbide Heziketan egokituko duten espazioa aproposa iruditzen zaio Callejori: "Orain, kontu ekonomikoak bideratzen gabiltza. Martxan egotea espero dugu uda bukaeran edo datorren neguan". Datorren larunbatean, martxoaren 19an, aurkeztuko dute egitasmoa, 11:00etan Lanbide Heziketan bertan.

Zaraobe institutuko ikasleak ari dira egurrezko piezak osatzen, Urduñako boulderra aurtengo uda amaieran erabilgarri egoteko

Patxadaz baina gogotsu dabiltza: "Aurrera begira irteerak eta ekintzak egin nahi ditugu. Ideia asko eta oso politak ditugu. Amurriokoa da hurbilen dugun boulderra, baina garestia eta txikia da. Horregatik, ohikoan arrokan eskalatzeko mendira joaten gara, baina neguan sasoia mantentzeko bulderra behar da. Leku faltagatik atera da proiektua".

Txarlazo Mendi Taldearekin batera mamitu dute proiektua: "Urduñan elkarte asko daudenez, Txarlazo Mendi Taldekoekin batzea erabaki genuen. Antzina bazuen sekzioa, eta proiektua aspaldikoa zen, baina ez ziren aurrera atera. Anexioa egin dugu taldearekin, Txarlazo mendi taldearen eskalada sekzioa izango da gurea. Instagram eta Facebook kontuak zabaldu ditugu, berriak eta egutegia zabaltzeko".

Erronka berriz beteriko urtea

Sendo hasi du urtea, beraz, Urduñako Txarlazo Mendi Taldeak. Ohiko ekimen eta irteerez gain, gainera, beste zenbait proiektu abiatu dituzte. Horien artean daude 6-12 urte bitarteko herritarrak mendizaletzeko 4 txango egitea, Lendoñobeitiko errota bisitatzeko txangoa antolatzea, edota Otxomaio jaietako ekintza berezia. Xehetasunak, baina, unean une emango dituzte, ohiko kanalen bidez.

Igande honetan Babiotik Urduñara egingo du Txarlazo mendi taldeak zeharkaldia, eta boulderraren aurkezpena izango da hurrengo jarduera:

May be an image of text that says 'PRESENTACIÓN DEL PROYECTO ESKALADA BOULDERRA PROIEKTUAREN AURKEZPENA Martxoak 19 Marzo A las 11:00-etan Edificio FP eraikina'

Kirola Urduña

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.

Izan bazkide