2017ko martxoan Erauntsi Dantza Taldeak hainbat aldaketa egin zuen bere funtzionamenduan eta askorentzat, nolabait, berriro sortu zen. Hori dela eta, elkartearen urteurrena martxoan ospatzeari ekin zioten eta horretarako dantzapoteoa antolatzen zuten. Aurten, aldiz, 5. urteurrena denez, egitarau luzeagoa prestatu dute.
Horrela azaldu du taldeko kidea den Amaia Del Campok: "ekainean egin ohi dugu Erauntsiko bazkaria, baina aurten politagoa iruditu zaigu urteurrena eta bazkaria batzea. Behin egitaraua luzatuta, ideia gehiago bururatu zitzaizkigun".
Burutazio horien emaitza izan da hurrengo proposamena:
- 13:00 // Dantzapoteoa Foru Plazan.
- 15:00 // Herri bazkaria Eskola Publikoko karpan. Izena emateko epea itxi dute dagoeneko eta menua honakoa izango da: patatak errioxar erara, haragi gisatua eta pastela.
- 18:00 // Erruki Erromeria, Patxi eta Konpania eta DJ Varro. Kontzertuaren sarrerak 2 euro balioko du.
Elkartasun ekimena
Elkartasunak garrantzia handia izango du jaiaren barruan. Hain zuzen, aurten eskuratzen den dirua AEFAT elkarteari emango diote. Ataxia telangiectasia gaixotasun arraroan zentratzen du elkarte horrek bere jarduera.
Edonola ere, Amaia Del Campok aipatu du urterik urte hori aldatuko dela: "Hainbat elkarteri eskaini nahi diegu babesa. Aurten iruditu zaigu AEFATi eman behar geniola, baina hurrengo urteetan beste batzuk izango dira, Urduñakoak badira, hobe".
Horrez gain, antolakuntzak iragarri du Ukrainako umeei laguntza ematen dien beste elkarte batek parte hartuko duela jaian. Euren materiala eta janaria salduko dute txosnan.