Atzo, martxoak 18, Museoen Nazioarteko Eguna izan zen eta Orduña Hiria Museoko kideek inaugurazioaren hirugarren urteurrena ospatzeko probestu zuten eguna. 'Porrilló' artistaren lanaren inguruko solasaldia izan zen ekintza nagusia.
Martxotik ikusgai dago Juan Luis Abajo 'Porrilló' urduñarraren obra Museoko Fede Ruíz aretoan. Atzoko ekitaldian, ordea, ikusgai dauden artelanetatik harago, margolariaren obra guztiaren birpasa egin zuten jendez betetako aretoan. Osasun arazoak tarteko, 'Porrilló' ezin izan zen solasaldira bertaratu, eta Leire Sain de Aja artista arduratu zen bere lanak aurkezteaz. Eguna amaitzeko, mokadua eskaini zuten, Peri Ibañez musikari urduñarrak eraikina girotzen zuen bitartean.
Ekintza gehiago
Museoen Nazioarteko Eguneko ospakizunak ez dituzte atzo arratsaldeko ekintzara mugatu soilik. Goizean ere ate irekien jardunaldia eskaini zuten. Aste osoan zehar, gainera, hiriko ikastetxeetako ikasle eta irakasleen bisitak jasotzen ari dira.
Aldi baterako erakusketa berria ere inauguratu berri dute Orduña Hiria museoan; Cristina Dulanto margolariaren Texturas y musas olio-pintura bilduma.