Datorren ikasturtean irekiko ditu artean Urduñako Musika Eskolak. Udalak abiatu du egitasmoa, Santa Zezilia bandarekin elkarlanean. Azaldu dutenez, “asmo handiko proiektua” da, eta irailaren erdialdean hasiko dira klaseak, musika bandak Gran Via kaleko 10. zenbakian duen lokalean.
Jesus Cipriano Urrutia eta Jose Angel Santos arduratuko dira eskola dinamizatzeaz. “Eskarmentu handia” dute biek musika irakasle moduan, tokiko erakundeak nabarmendu duenez. “Astean ordubeteko musika-hizkuntza klasea emango dute taldeka, eta astean ordu erdiko musika saioa banaka”.
Honako instrumentu hauen artean aukeratu ahalko dute ikasleek:
- Metalezko haizea: tronpeta, tronboia, tronpa, bonbardinoa eta tuba
- Zurezko haizea: klarinetea eta saxofoia (saxo altua edo saxo tenorra)
Izen ematea irekita
Uztailaren 16ra arte egongo da aurreinskripzioa egiteko aukera, Alondegian. “Ikasle bakoitzeko kostua 35 eurotik 45 eurora bitartekoa izango da hilean, aukeratutako irakasgaien arabera”, zehaztu du udalak, “izena emateko gutxieneko adina 8 urtekoa izango da”.
Gehienez 18 ikasle biltzea dute helburu. Gauzak hala, kopuru hori gainditzen bada, zozketa bidez ebatziko dute nor hartu. Aurreratu dutenez, asteko bi egunetan emango dituzte klaseak, 16:30etatik 21:30etara.