Ostiralean Urduñako igerilekuetan arratsaldetik gaua heldu arte parranda, dantza eta kirola elkartuko ditu Aiara Berri futbol areto klubak. Horretarako, honako egitaraua prestatu dute:
16:00-19:00 // Umeen partidak
19:00 // Erauntsi dantza taldearen erakustaldia
20:00 // Viejas Glorias Orduña-Aiara Berri partida
21:30 // Menda Lerenda DJ eta Karrifest taldearen kontzertua
Erauntsi Dantza Taldearen laguntza izan du kirol klubak eta bere asmoa izan da iazko egitasmo arrakastatsua beste ekimen batekin ordezkatzea. Izan ere, 2021ean futbol areto txapelketa antolatu zuten eta jendetza bertaratu zen partidak ikustera.
Aurten, kirolari bestelako proposamenak ere gehitu dizkiote, futbol aretoa bera sustatzeko. Giro polita sortzea espero dute horretarako, Aiaraldea Komunikabideari azaldu diotenez. Umeek izena emateko epea irekita dute eta horretarako igerilekuetako barrara jo behar dute.
Aiara Berri kluba 2020an sortu zuten. Zehazki, aurreko urtean Amurrioko beste talde batean ezagutu ziren jokalariek egin zuten. Primeran konpontzen zirenez eta oso gogoko zutenez elkarrekin entrenatzea, erabaki zuten euren berezko taldea izatea.