Urduñako Txarlazo tontorrerako igoera jaso du Bizkaiko Mendi Federazioak bere egutegian, ''BBK mendi martxa' zikloaren barruan. Orotara, 5 txango aukeratu dituzte dinamikarako, eta Urduña izango da lehenbizikoa. Hain zuzen, hilaren 25ean egingo dute mendi ibilaldia, Santiago Eguna aprobetxatuta. Izan ere, ohitura handia dago Urduñan bertara igotzeko, Txarlazo Mendi Taldearen deialdiari jarraiki. Urduñako plazatik abiatuko dira mendizaleak 9:00etan.
Urduñako zeharkaldirako uztailaren 21 aurretik eman beharko da izena, eta partaideek tokiko produktuekin betetako motxila jasoko dute
Proiektuan parte hartzeko beharrezkoa da izen ematea. Internet bidez osatu daiteke inskripzio fitxa, Bizkaiko Mendi Federazioaren webgunean. BBK Martxa ekimenaren sustatzaileen esanetan, helburua da Bizkaia osoko mendi tontorretara jendea mugiaraztea. "Behar bereziak dituzten pertsonak ere hurbilduko ditugu mendira, eta Zero Hondakin ere, ibilbidea garbitzeko", erantsi dute.
Urduñako zeharkaldirako uztailaren 21 aurretik eman beharko da izena, eta partaideek tokiko produktuekin betetako motxila jasoko dute.
Era berean, bezperan, hitzaldia antolatuko dute 19:30ean Alondegian: Jeronino Lopezek Izozteak, mendiak eta klima aldaketa konferentzia eskainiko baitu uztailaren 22an.
