Urduñako Arando korrikalari taldeak antolatutako Urduña Hiria Herri Krosak badu data: irailaren 25a. Hitzordua egun horretan izango bada ere, jadanik 59 kirolarik eman dute izena. Proba nagusian parte hartzeak 8 euro balioko du eta paralinpikoan zein haurren lasterketan aritzeak, aldiz, euro bakarra.
Krosa irailaren 25ean, 11:30ean, izango da eta 10 kilometroko ibilbidea bete beharko dute parte hartzaileek
Aiaraldea Komunikabideak, babesle den aldetik, bi dortsal banatuko ditu zozketaren bidez irailaren 16an. Krosa 11:30ean izango da eta 10 kilometroko ibilbidea bete beharko dute parte hartzaileek.
Herri krosean lehiatzeko 2006an edo lehenago jaio izan behar da. Berez, beste hiru kategoria ere egongo dira: Mini-txikiak (2014an edo geroago jaioak), Txikiak (2007 eta 2013 urteen artean jaiotakoak) eta paralinpikoak.
Alabaina, beste bi kategoria sortu dituzte beteranoentzat. Sariak emateko orduan lehen hiru postuak hartuko dituzte kontuan, irabazleari 70 euro, bigarrenari 60 euro eta hirugarrenari 50 euro emanez; gizonezkoen zein emakumezkoen artean. Ildo beretik, 40 euro emango dizkiote Urduñako lasterkari onenari. Lehen hiru sailkatuei produktu sorta ere oparituko diete 13:15ean.