Irailaren hasieran animalien kontrako bi eraso jazo ziren Urduñan. Bi gertakariek ez dute harremanik euren artean, baina bietan txakurren jabeek deitu zuten Ertzaintza, erasotzaileak identifikatzeko.
Lehen kasuan, adingabe bat bere maskota paseatzen ari zen ibaiaren alboko bide batetik, "50 edota 60 urte bitarteko gizonezko bat agertu zenean makil batekin". Hala adierazi dio gazteak Aiaraldea Komunikabideari. Txakurra hurbildu zitzaionean, gizonak makilkada indartsua jo zion.
Animalia lurrean botata geratu zen mugitu gabe, erasotzailea biraoka aldendu zen bitartean. Adingabeak txakurra lurretik jaso eta besoetan eraman zuen etxera. Orduan, jabeak gertakariaren inguruetara bertaratu ziren gizonezkoaren bila, baina ez zuten topatu. Ertzaintza ere deitu zuten, baina bi patruilek ez zuten erasotzailearen arrastorik topatu.
Edonola ere, hurrengo egunean adingabeak erasotzailea kaletik ikusi zuen eta poliziari emandako deskribapenarekin eta bildutako datuekin identifikatu ahal izan zuten. Salaketa jarrita, epaiketaren zain daude.
Beste eraso bat
Irailaren hasieran, 9an, hain zuzen, beste eraso bat gertatu zen Urduñan. 5 kiloko txakur baten jabeak azaldu dio Aiaraldea Komunikabideari gizonezko batek ostikoa eman ziola animaliari, inolako arrazoirik gabe.
Jabeak azpimarratu du erasotzaileak barre egin zuela eta berak jarraitu zuela, Ertzaintza deitzen zuen bitartean. Poliziak gizonezkoa identifikatu zuen eta maskotaren jabeak salaketa jarriko duela ziurtatu du.