Orientazio lasterketen hiriburu bihurtuko da Urduña urriaren 22 eta 23an. Izan ere, Bidea Orientazio Klubak, COBIk, XX. Bizkaia Saria antolatuko du bertan. Bi kirol probek osatuko dute asteburuko egitaraua: Errelebo mixtoen esprint txapelketa eta iparraldeko ligaren barruko lasterketa klasikoa.
Larunbatean, urriak 22, Urduñako hirigunean bertan egingo dute orientazio proba: Errelebo mixtoen esprint txapelketa. Parte hartzaileak 17:00etan abiatuko dira eta 19:00ak arte izango dute tartea alde zaharrean eta inguruko auzoetan izkutatuta egongo diren balizak bilatzeko.
Urriaren 23an, aldiz, distantzia lasterketa klasikoa egingo dute. Iparraldeko ligako 10. eta azken jardunaldia izango da, eta bertan ebatziko da txapelketako behin betiko emaitza. Lasterketa Gorobel azpiko baso eta larre artean jokatuko da. COBI taldeak orientazio probaren eremua egin berri du publiko, eta parte hartzaileek debekatuta izango dute gaurdanik urriaren 23ra arte inguru horietatik igarotzea.
Herri lasterketa
Errelebo mixtoen esprint txapelketak Open kategoria bat izango du, baina federatutako klubetako kideek hartu ahalko dute parte soilik. Igandeko lasterketan, aldiz, edonork izango du aritzeko aukera; "orientazio probetara lehen aldiz gerturatu nahi dutenak zein orientazioan eskarmentua dutenak", antolatzaileek adierazi dutenez.
Lo lekua kirolarientzat
Antolakuntzak lo lekua eskainiko du asteburuan Urduñara bertaratzen diren kirolarientzat. Urduñako frontoia atonduko dute, eta bertan lo egiteak euro bateko kostua izango du. Lo lekua larunbateko 19:00etatik igandeko 10:00ak arte egongo da zabalik.
Autokarabana eta furgonetekin datozen parte hartzaileak, aldiz, hirigunean bertan dagoen aparkalekura bideratuko ditu antolakuntzak.