8.307.186,64 euroko aurrekontu bateratua onartu zuen Urduñako Udalak abenduaren 27an eginiko osoko bilkuran. Udala eta bere bi sozietateak barnebiltzen ditu plangintza ekonomikoak: Urduñederra, S.L. eta Urduñako Arkupea, S.L.
2023rako, aurreko ekitaldian baino 741.782,10 euro gehiago izango ditu tokiko erakundeak. Aurrekontuek EH Bilduren aldeko botoekin eta EAJren abstentzioarekin egin zuten aurrera.
Urduñako Udalari dagokionez, diru-sarreren eta gastuen aurrekontua 6.575.175,48 eurokoa izango da. Aldiz, Urduña Ederra SL sozietateak, 481.130,52 euroko diru-sarrera eta gastuen aurrekontua aurkeztuko du. Bestalde, Urduñako Arkupea SL sozietateak 2.120.765,64 euroko diru-sarreren eta gastuen aurrekontua izango du hurrengo ekitaldirako.
Diru sailak horrela banatu dituzte:
- Ogasuna eta Barne Araubidea: 2.107.502,40€ (%32,05), 2022an baino 165.723,96€ gehiago, batez ere 2023rako soldata-igoerengatik, arkitekto-lanpostu berri bat sortzeagatik eta elektrizitatea eta gasa bezalako horniduretan gastu handiagoa izateagatik. Izan ere, 2022. urtearekin alderatuta, hazkundea handia izan da.
- Obrak eta Zerbitzuak: 774.164€ (%11,77), 2022an baino 31.671,64€ gehiago, egingo diren inbertsio berrien ondorioz. Oro har, mantentze lanetako partidaren bat gutxitu da, eta handitu egin dira asfaltozko inbertsioak, bideen konponketak, Kale Nagusiko saneamenduko inbertsioa eta Licenciado Poza plazako urbanizazioa.
- Gizarte Ongizatea: 962.700,00€ (%14,64), 2022an baino 267.784€ gutxiago. Izan ere, 2021ean egoitzako 2020ko eta 2021eko defizita bere gain hartu behar izan zuen Udalak, okupazio txikiaren ondorioz batez ere. 2022an, eskatutako mailegu bati aurre egin behar izan zitzaion COVID-19ak sortutako gastuez arduratu ahal izateko. Gizarte Ongizateko gainerako partidak mantendu egin ziren.
- Kultura, Euskara, Kirolak eta Hezkuntza: 550.543€ (%8,37), 2022an baino 48.148€ gehiago, batez ere, zerbitzuen kostuen igoerarengatik, kontratazio kostuen igoerarengatik, eta Musika Eskolaren proiektuak 2023an harrera onagatik jarraitzen duelako.
- Hirigintza eta Ingurumena: 1.377.042,04 € (%20,94), 2022an baino 393.822 € gehiago, batez ere Landatas eta María Dolores Madaria auzoetako zerbitzuen igoeren eta hiri-berrordenatzearen ondorioz.
- Ekonomia Sustapena: 803.224,04 € (%12,21), 2022an baino 226.973,04 € gehiago, Urduña Lanean proiektuaren ondorioz, non 10 pertsona kontratatu diren, turismoan proiektu berriak garatzeko, industria-sektorearen dinamizazioa egiteko eta, batez ere, elikadura-estrategian aritzeko.
Udalak aurreikusitako inbertsio nagusiak honako hauek dira:
- Poza Lizentziatuaren plaza urbanizatzea Kale Nagusian (360.000 euro, horietatik auzokideek kostuaren %60 ordainduko dute).
- Kale Nagusiko eta Agua Saladako saneamendua hobetzea (50.000€).
- Plan Orokorraren Berrikuspenaren jarraipena (60.674,04€).
- Eras de Polanco asfaltatzea (15.000 €).
- Getxako aparkalekua (15.000€).
- Bide konponketak Ruzabalen (11.000€).
- Makinak, hiri-altzariak eta gainerakoak erostea (25.000€).
- Bulegoetako altzarietan eta ekipo informatikoetan inbertsioak egitea (10.000€).
Zorrak
Tokiko erakundeak 170.293,82€ ordaindu beharko ditu Kutxabanken 2004 eta 2005 urteetako maileguengatik, Urduñederra, S.L. sozietatearen zorrez gain (121.437,84€). 2023an, beraz, Urduñak 291.731,66€ ordaindu beharko dizkie erakunde hartzekodunei.
Aiaraldea Berpizteko Berehalako Ekintza Planaren bidezko dirulaguntzak
Berpiztu Euskadiko ekonomia eta enplegua suspertzeko 2022-2024 programaren aldetik, Urduñako Udalak hainbat laguntza jaso ditu. Alde batetik, Lurralde Plangintza Sailetik, 1.650.000€ jaso ditu Landatas eta María Dolores Madaria auzoak biziberritzeko. Udalak kudeatuko dituen bizilagunentzako laguntzak dira horiek.
Gainera, Kultura Sailak 700.000€ esleituko dizkio Udalari ondare historikoa berreskuratzeko eta, azkenik, Bizkaiko Foru Aldundiak 80.000€ bideratuko ditu udalerrian turismoa bultzatzeko proiektuak egiteko.
Proiektu horiek 2022., 2023. eta 2024. urteen artean garatu beharko dira, egitasmoaren irismenaren arabera.