Modfie enpresak kudeatuko ditu pelikularen figuranteak. “Adin eta profil guztietako pertsonak” behar dituztela zabaldu du. Arreta berezia oinarrizko musika ezagutza duten gazteengan jarri dute. Hori dela eta, izena ematean profil hori betetzen duten pertsonek hala zehaztu beharko dutela adierazi dute antolatzaileek.
Ibon Cormenzanak zuzenduko du pelikula eta Pachamama A.I.E eta Arcadia Motion Pictures taldeek ekoitziko dute. Gaur egunean girotuta egongo da, eta grabaketak Urduñan eta Bilbon egingo dituzte, martxo erdialdetik apirilera. Enpresa kontratatzaileak zehaztu duenez, lokalizazioen gertuko bizilagunei emango diete lehentasuna, ez baitute kilometrajerik ordainduko.
Castinga, presentzialki zein online
Aurrez aurreko castinga ostiral honetan izango da, otsailaren 3an, goizez eta arratsaldez. Urduñako Alondegian jarri dituzte hitzorduak: 10:30etik 13:30era eta 16:30etik 19:15era. Hala ere, modfie.com plataforman profila sortuta dutenek -edo orain sortzen dutenek- ez dute aurrez aurreko zitara joan beharko. Hauek “selfie motako egungo argazki bat” igo beharko dute plataformara.
Horrez gain, enpresak zehaztu du pelikulan parte hartzeko lan baimena eta dokumentazioa egunean izatea nahitaezkoa dela. Adinez txikikoek NANa izan beharko dute parte hartzeko. Castingean izena ematen dutenek baldintza hauek bete behar dituzte eta grabaketa egunetan libre egon beharko dira.