Gogora institutuak 1937ko udaberrian hildako sei gudarien gorpuzkiak entregatu zizkien euren senideei iragan otsailaren 11an egindako ekitaldian. Aranzadi Zientzia Elkarteak Bilboko Begoñako hilerrian eta Gamiz-Fikan berreskuratutako gorpuzkiak dira, DNA bankuaren bidez identifikatuak.
Urduñan hildako miliziano abertzalea
Berreskuratutako gudari horietako bat da Martin Fabo Colera, Nafarroako Martzilla herrian jaioa, eta EAJko militantea. Gerra Zibila piztu zenean Otxandio batailoiarekin bat egin zuen 23 urteko gudari gazteak. Urduñako frontean larriki zauritu zuten 1937ko maiatzaren 27an, eta bere gorpua Bilboko Begoñako hilerrian lurperatu zuten.
Gudariaren gorpuzkiak 2022an atera zituzten Bgoñako hilerritik, bertan egindako indusketetan. Gogora Institutuaren 'Gerra Zibilean hildakoen datu-basean' agertzen zen haien ehorzketa lekua, baina haren familiak ez zuen horren berri jakinarazi zitzaion arte. Bere ilobaren DNAri esker identifikatu ahal izan zituzten hezur-hondarrak.
Duintasunaren Kolunbarioan hilobiratua
Senideek, Urduñako hilerrian iaz eraikitako Duintasunaren Kolunbarioan hobiratu nahi izan dituzte Martin Faboren gorpuzkiak. "Urduña defendatzen hil zen, eta bertan hartu behar du atseden" adierazi du Marivi Fabok, osabaren bila urteak eman dituen Martin Faboren ilobak.
Larunbatean hobiratu zituzten Faboren hezur-hondarrak kolunbarioan. Bertan izan ziren ere Urduñako Udal Gobernuko ordezkariak eta Gogora Institutuko kideak.