Eibarreko Udaletxean II. Errepublika aldarrikatu zela 92 urte betetzear daudela, PSE-EEko ordezkariek lore eskaintza egin dute gaur goizean Urduñako Duintasunaren Kolunbarioan. Eneko Andueza PSE-EEko idazkari nagusia izan da ekitaldi horretan buru, eta "duela 92 urte, II. Errepublikaren aldarrikapenarekin batera, itxaropen eta ilusio garai bat ekarri zuten gizon-emakumeak" omendu nahi izan dituztela nabarmendu du.
Anduezaren hitzetan, Errepublika garaian egin bezala, gaur egun ere eskubide sozialen aurrerapena gertatzen ari da Espainiako Estatuan. II. Errepublikari eta Gerra Zibilari erreferentzia eginez, "egian oinarritutako errelatoa" aldarrikatu du Anduezak.
"Azken egunetan ikusi dugu pertsona askok errelato hori aldatu nahi dutela"
Galdakaoko polemika mahai-gainean
Errelatoaren inguruko hitzok, Galdakaon piztutako polemikarekin lotu ditu Anduezak. PSE-EEk berak salatu zuen duela egun batzuk udal horren ekimenez egindako biktimen zerrenda batean "ETAren terrorismoa egin zuten" pertsonak ere agertzen zirela.
Galdakaoko Udalak eta Aranzadik azaldu dute erabilitako identifikazio eta kategorizazio irizpideak Eusko Jaurlaritzarekin eta Gogora Institutuarekin batera jarri dituztela, eta gezurtatu egin dute polemika.
"Azken egunetan ikusi dugu pertsona askok errelato hori aldatu nahi dutela" azpimarratu du Anduezak Urduñako Kolunbarioan egindako adierazpenetan. "Biktimak eta biktimarioak plano berdinean jartzen ari dira, eta hori onartezina da" salatu du PSE-EEko idazkari nagusiak.
"Sozialistok biktimekin egongo gara beti, egian oinarritutako errelato batekin aurrera egiteko. Biktima horientzako justizia eta erreparazioa lortzeko".
Alderdi sozialistak Aranzadik Galdakaoko biktimen atarian erabiliko zituen kategorizazio irizpideak ezagutzen zituen galdetuta, Anduezak adierazi du ezetz: "Sozialistok ez genuke inoiz hori onartuko. Batzuek edozein aitzakia erabiliko dute PSE-EE eta gainerako alderdiak euren akats larrian nahasteko helburuarekin eta hori erabat arbuiagarria da".
Juan Romero alkategaia
Datorren maiatzaren 28ko Udal Hauteskundeetarako alkategaia aurkezteko baliatu du PSE-EEk Urduñako Kolunbarioko hitzordua. Hain zuzen ere, Juan Romero Colomer izango da hautagaitza sozialistako zerrendaburua. JSE-Egaz gazte antolakundeko antolaketa-idazkaria ere bada Romero.