Goizeko zortzietan hasi eta iluntzeko ordu berdinera arte, 50 kilometrotik gora egin zituzten oinez Javi eta Xabi Irabien aita-semeek hamaika lagunekin batera, ataxia telangiektasia ikertzeko dirua bildu eta gaixotasuna ikusarazteko.
Hamar kilometro eta 300 metroko ibilbidea diseinatu zuten urduñarrek, inguruko bazterrak ezagutu eta edonork egiteko modukoa, azaldu dutenaren arabera. Bost bira egin zituzten eta bakoitzean jende multzo berri bat batu zitzaien ibilbidean laguntzera. Itzuli bat baino gehiago egin zuen lagunik ere egon zen, eta irabietarren lagun min batek bostak osatu zituen haiekin batera.
Biraz bira, ataxia telangiektasia gaixotasun arraroa ezagutarazten joan ziren ibiltariak Urduñako bazter guztietan. Plazatik abiatu eta hiriko txoko ugari gurutzatu zituzten: Urduñako kirol klubaren zelaia, Tologorri marmeladak, Santa Klara komentua, Artomaña txakolindegia… eta Hodeiren -ataxia telangiektasia duen gazte urduñarra- etxea. Gainera, Artomañako jaiak zirela-eta, jende ugari zegoen herrian eta azkenengo itzulian horietako asko erronkazaleei batu zitzaizkien Urduñako plazaraino.
Javi Irabien oso pozik dago igandean piztu zen giroarekin eta gaixotasuna ezagutzera emateko egindako lanarekin.
Olaran elkarteko kideekin ere oso eskertuta dago, izan ere, azpiegitura guztiaz arduratu ziren eta “beti daude laguntzeko prest, proposatzen diezuna proposatzen diezula”. Horregatik argi du hau ez dela izango azken erronka solidarioa. “Laster okurrituko zait zerbait eta jende honekin oso erraza da gauzak egitea”, aitortu du Irabienek.
Ekarpen ekonomikoak egiteko aukera
Ekimenean bildutako diru guztia Ataxia Telangiectasia gaixotasun neurodegeneratiboa ikertzeko bideratuko da, Aefat elkartearen bitartez.
Interneten ere bada dirua emateko aukera Migranodearena.org atariaren bidez. Oraingoz 555 euro bildu dituzte plataformaren bidez eta Javi Irabienek azaldutakoaren arabera, atzo arratsaldean nabarmen egin omen zuen Interneteko bilketak.
Argazkiak: Antonio Muñoz