Urduñako Zageras kalean elkartu dira Euskadiko Errepublikaren Batasuneko eta Elkarrekin Podemoseko kideak hiriko udal hauteskundeetan aurkeztuko duten zerrendaren berri emateko. Mikel Aguirre Rodrigo izango da alkategaia, 2015ean bezala, eta Bizkaiko Foru Aldundian Elkarrekin Podemosen zerrendaburua den Eneritz de Madariagarekin batera aurkeztu du hautagaitza.
Izan ere, zerrenda bateratua aurkeztuko dute URE-EBB Euskadiko Errepublikarren Batasunak eta Elkarrekin Podemosek Urduñan maiatzaren 28an. Horrek elkarlanerako bidea irekiko duela azaldu du Aguirrek, eta De Madariagak azpimarratu du bere taldearen bitartez urduñarrak eta beren beharrak ordezkatuta egongo direla Bizkaian.
“Zenbait arrazoi medio” 2019ko hauteskundeetan URE-EBBk ez zuen zerrendarik aurkeztu Urduñan, baina ibilbide luzea dute errepublikazaleek udalerrian. Geldialdi horren ostean, “indarberrituta” itzuli direla azaldu du gaurko ekitaldian Mikel Aguirrek. Jende eta indar berriekin, Urduñan beste alternatiba bat izateko asmoa dute.
Asteartean eman zuten zerrenda osoaren berri.