Gogora Institutuak jakinarazi duenez, identifikatu dute Urduñako hilerrian desobiratutako frankismoaren biktimen artean lehenengoa. Aintzane Ezenarrok, Gogora Institutuko zuzendariak, eman du aurkikuntzaren berri, eta "oso albiste pozgarri" bezala kalifikatu du.
Extremaduratik Urduñako espetxera eraman zuten Llorens. Ikerketen arabera, 1941eko apirilaren 6an hil zen, 55 urte zituela.
Fructuoso Llorens
Fructuoso Llorens da identifikatutako lehenengo biktima. Jatorriz Badajozeko Fuente del Maestre herriko bizilaguna zen Llorens, eta nekazaritza zuen ogibide. Gerra Zibileko azken urtean, 1939an, etxetik indarrez atera zuten, eta geroztik senide eta lagunek ez zuten haren berririk izan. Extremaduratik Urduñako espetxera eraman zuten eta, ikerketen arabera, 1941eko apirilaren 6an hil zen, 55 urte zituela.
Extremadurako nekazariak lau alaba zituen, eta horietako bat izan da identifikazioa gauzatu ahal izateko giltzarria: Juana Llorens. Aita etxetik atera zutenean 10 urte zituen Juanak, orain 94 ditu. Iragan otsailean ADN lagin bat entregatu zion Gogora Institutuari, Urduñako gorpuak identifikatzeko kanpainaren barruan, eta horri esker lortu dute hezurrei izena jartzea.
Gogora Institutuak Francisco Llorensen familiari entregatuko dizkio gorpuzkiak datozen hilabeteetan.
Identifikazio lanak aurrera
Aranzadi Zientzia Elkarteak 2014an eta 2022ko abenduan egin zituen indusketak hiriko hilerrian, eta 1939 eta 1941 urteen artean Urduñako espetxe frankistan hildako presoen gorpuak aurkitu zituen bertan. Fructuoso Llorens da bertan aurkitutako 71 biktimen artean identifikatutako lehenengoa. Lanak, beraz, ez dira amaitu.