ARGAZKIAK

Azken hiru legealdietako lana balioan jarri eta aurrera urratsak ematen jarraitzeko beharra azpimarratu du EH Bilduk Urduñan

Aimar Gutierrez Bidarte 2023ko mai. 19a, 07:00

Hauteskunde kanpainako ekitaldia egin zuen atzo EH Bilduk Urduñako Foru Plazan. Iker Casanova ahaldungaia eta Ion Iñarritu diputatua izan ziren Itziar Biguriren hautagaitza babesten. Bigurik azken hiru legealdietan egindako lana goraipatu eta aurrera egiten jarraitzeko beharr azpimarratu zuen.

Laugarren legealdia jarraian bete nahi du EH Bilduk Urduñako udal gobernuan, eta azken 12 urteetan hiriak bizi duen eraldaketan sakontzen jarraitu. Horrela adierazi zuen Itziar Biguri alkategaiak Foru Plazan egindako hauteskunde kanpainako ekitaldian.

Bigurik balioan jarri zuen azken hiru legealdietan EH Bilduk egindako lana. Koalizio abertzaleak zabaldutako Monty Paytonen bideo moldatuari egin zion erreferentzia Bigurik hitzartzean: "Azken hamabi urteetan egindako hainbat ekimen eta proiektu zerrendatzen ziren bertan, baina askoz gehiago izan dira. Lan eskerga egin dugu herri hau aurrera ateratzeko".

Baina, gauzatutako proiektu eta ekimen guztien artean bat nabarmendu zuen egungo alkateak bereziki: udal-gobernu jeltzaleak utzitako zorra ia guztiz murriztea.

Hauteskunde kanpainako gako nagusiak aletu zituen Itziar Bigurik atzoko ekitaldian. EH Bilduk lau ardatzen inguruan jarraitu nahi du Urduña eraldatzen: gizarte ereduan, hiri ereduan, ekonomia ereduan eta kultura ereduan.

Larruazabalgo batzarra osatzen duten lau kontzejuak ere kontuan hartuko dituztela azaldu du Bigurik, Bizkaiko Foru Aldundiarekin batzarren finantzaketa eredu propioa negoziatuz, besteak beste.

"Urduña eredu"

Iker Casanova ahaldungaia eta Ion Iñarritu diputatua Urduñako Foru plazan izan ziren atzo, Itziar Biguriri eta hautagai-talde osoari babesa adierazteko asmoz.

Turkiatik etorri berria zen Iñarrituk goraipatu egin du EH Bilduren udal gobernuaren kudeaketa eredua. Madrilen ordezkaritza izateak duen garrantzia ere azpimarratu du diputatuak, hiriak tren-zerbitzuarekin dituen arazoak gogora ekarriz.

Bide beretik udal gobernuak "hiria eraldatzeko" egindako lana azpimarratu du Iker Casanovak ere. "Gaur egun, Urduña kudeaketa onaren, gobernantza irekiaren, saneamendu ekonomikoaren eta konponbideak eraiki, ekarri eta sortzen dituen udal baten adibidea da", adierazi du ahaldungaiak. "Esfortzuak merezi duela" goraipatu du Casanovak, "politika onak jendearen bizitza aldatzen duela" aldarrikatuz.

Argazkiak: Aimar Gutierrez Bidarte

Politika Urduña

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide